‘तेल भिसा’को पोस्टरमा दोहोरो भूमिकामा विपिन, मंसिर ७ मा रिलिज
चलचित्र ‘तेल भिसा’को पोस्टरमा अभिनेता विपिन कार्कीलाई दोहोरो भूमिकामा प्रस्तुत गरिएको छ । सार्वजनिक पोस्टरमा उनलाई जवान र बृद्ध दुई फरक लुक्समा देख्न सकिन्छ ।
पोस्टरमा अभिनेत्री वर्षा राउत, ऋचा घिमिरे र पूजा लामाका साथमा केही विदेशी कलाकार देख्न सकिन्छ । चलचित्रमा बुद्धि तामाङको पनि मुख्य भूमिका रहेको छ ।
शंकर घिमिरेको निर्देशनमा निर्माण भइरहेको चलचित्रको आजबाट दोस्रो चरणको छायांकन हुँदै छ । पहिलो चरणको छायांकन केही समय अगाडि अमेरिकामा गरिएको थियो ।
वेलडन क्रियसनको व्यानरमा ऋचा घिमिरेको प्रस्तुति रहेको चलचित्रमा अनिश पाण्डे र शिवराज कार्कीको लगानी छ । प्रिन्स युवराज कार्की र श्रुती दाहाल कार्यकारी निर्माता रहेको तेल भिसामा सुशन प्रजापतिको छायांकन छ ।
रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्धाजको संगीत, विजय बस्यालको पोस्टर डिजाइन र अजय खड्काको सम्पादन रहनेछ ।
चलचित्र मंसिर ७ गतेबाट प्रदर्शनमा आउने भएको छ । यसअघि भदौ २९ गते रिलिज हुने भनिएको थियो ।
