दर्शकको नजरमा परेका आँचल र विवेक
नायिका आँचल शर्मा र नव–नायक विवेक कर्माचार्यको मुख्य भूमिका रहेको चलचित्र ‘वर एण्ड बधु’ भदौको १४ गतेबाट प्रदर्शन हुने तयारीमा रहेको छ ।
मिलन चाम्सको निर्देशनमा तयार भएको यो चलचित्रको पहिलो गीत ‘तिमी सँग’ केही दिन अगाडि सार्वजनिक गरिएको थियो । भिडिओ सार्वजनिक भएको एक साता पुग्दा यो गीतले करिब आठ लाख भ्यूज युट्युबमा बटुलेको छ । साथै, यो गीतको युट्युबको ट्रेन्डिङमा समेत आएको छ ।
अञ्जु पन्त र प्रताप दासको स्वर रहेको गीतमा लेखु सहयात्रीको शब्द रचना छ भने अर्जुन पोखरेलको संगीत छ । रोमानियाको सुन्दर दृश्यहरुले आकर्षक बनेको गीतको भिडिओले नायिका आँचल र डेब्यू नायक विवेकको एकअर्काप्रति प्रेम र आशक्ति दर्शाउँछ । सार्वजनिक गीतलाई दर्शकले सकारात्मक प्रतिक्रिया दिएका छन् । अधिकांश दर्शकले गीत निकै मिठो रहेको प्रतिक्रिया दिएका छन् । यस्तै, आँचल र विवेकको दर्शकले तारिफ गरेका छन् ।
चलचित्रका निर्देशक चाम्स आफूले ‘लिलिबिली’पछि अर्को रोमान्टिक कमेडी सिनेमा बनाएको र आफूलाई यस्तो खालका चलचित्र बनाउन मन पर्ने बताउँछन् । गीतले दर्शकको साथ पाउन थालेपछि आँचल उत्साहित देखिएकी छिन् ।
तीजको छेको पारेर रिलिज गर्न लागिएको ‘वर एण्ड वधू’ ले सामाजिक कथालाई रमाइलो शैलीमा भन्ने निर्माणपक्षले बताएको छ ।
चलचित्रमा आँचल र विवेकका अलावा गरिमा शर्मा, बिजु पार्की, हिमेश पन्त, सृष्टि खड्का, विजय लामा, किरण केसी, कुसुम शर्मा, सरिता लामिछाने, रवीन्द्र खड्का, अन्शु महर्जन, दिनेश काफ्ले, सीता न्यौपाने, शूरवीर पण्डित, हिउँवाला गौतम, यमन श्रेष्ठ लगायत कलाकारको पनि मुख्य भूमिका छ । विवेकको यो डेब्यु फिल्म हो ।
एलआरके इन्टरटेन्मेन्टको ब्यानरमा तयार भइरहेको चलचित्रमा निर्माता जानुका थापा र कार्यकारी निर्माता अमित रिजाल हुन् ।
यो चलचित्रको छायांकन नेपाल र रोमानियामा गरिएको हो ।