‘घर नम्बर २’मा केकी र उपासनाको इन्ट्री
काठमाडौं । चलचित्र ‘के घर के डेराः घर नम्बर–२’मा केकी अधिकारी र उपासना सिंह ठकुरी फाइनल भएका छन् । केकी र उपासना दुबैसँग निर्माणपक्षले कागजी संझौता गरेको छ ।
शुक्रबारदेखि छायांकनमा जान लागेको चलचित्रमा अधिकारी र ठकुरी फाइनल भएसँगै मुख्य कलाकारहरुको लाइनअप पूरा भएको छ ।
यो फिल्मको मुख्य अभिनेताहरुमा खगेन्द्र लामिछाने, निश्चल बस्नेत र आर्यन सिग्देल फाइनल भइसकेका छन् ।
केकीले ‘बोक्सीको घर’ ब्लकबस्टर भएपछि ‘के घर के डेराः घर नम्बर २’मा काम गर्न लागेकी हुन् । उपासनाले फिल्म ‘खुस्मा’को छायांकन सकेपछि यो फिल्ममा काम गर्न लागेकी हुन् ।
दीपेन्द्र के खनालको निर्देशनमा तयार हुन लागेको फिल्मको कथा वुद्दिसागरले लेखेका हुन् । फिल्मको छायांकन काठमाडौंमा हुने निर्माणपक्षले बताएको छ ।
ए प्लस इन्टरटेन्मेन्ट र नटराज क्रिएसनको ब्यानरमा निर्माण हुन लागेको यो फिल्ममा शरद श्रेष्ठ, किरण महर्जन, राजिव श्रेष्ठको लगानी रहनेछ । फिल्मका कार्यकारी निर्माता युवराज कार्की हुन् ।
फिल्मलाई सामाजिक कथावस्तुमा निर्माण गरिने निर्माणपक्षको भनाइ छ । यो फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनीले वितरण गर्ने भएको छ । फिल्मलाई यही वर्ष नै रिलिज गर्ने तयारी गरिएको छ ।
