बेनिशाको बढ्दो व्यस्तता, पलसँग दोस्रो चलचित्रमा सहकार्य गर्दै
नायिका बेनिशा हमालको व्यस्तता पछिल्लो समय निकै बढेको छ । उनको व्यस्तताको कारण हो हतमा धेरै फिल्म हुनु ।
अभिनय करिअरको एक दशकभन्दा लामो अवधिमा अभिनेत्री बेनिशा हमालले पहिलो पटक ‘छक्का पञ्जा ४’ हिट फिल्म भेटाएकी थिइन् । यो सिनेमाको सफलताले उनको करिअरलाई नै पूर्नजीवन दियो । अहिले उनलाई चलचित्रका लागि समय मिलाउन हम्मेहम्मे परिरहेको देखिन्छ ।
बेनिशाको हातमा आधा दर्जन चलचित्र छन् । उनले साइन गरेर लाइनअपमा रहेका सिनेमामा ‘एक्लो’, ‘कल्ली’, ‘बिजुली’, ‘भाँडाकुटी’, ‘कोत पर्व’ छन् भने हालै अर्को नयाँ सिनेमा ‘मोहर’ साइन गरेकी छन् ।
‘मोहर’लाई ओम प्रतीकले निर्देशन गर्ने भएका छन् । यसअघि यो सिनेमामा पल शाह, अर्जुनजंग शाही र नीति शाह फाइनल भइसकेका छन् ।
मेकर्स प्रा.लिको प्रस्तुतिमा तयार हुन लागेको चलचित्रमा ओम प्रतीककै लेखन छ । चलचित्रलाई सुमनजंग शाहीले निर्माण गर्दैछन् । निर्माणपक्षका अनुसार यो चलचित्र माघदेखि छायांकनमा जानेछ ।
यता पल र बेनिशाले दोस्रो पटक चलचित्रमा सहकार्य गर्ने भएका छन् । उनीहरुले ‘कल्ली’पछि ‘मोहर’मा सहकार्य गर्न लागेका हुन्।
रेड बर्ड प्रोडक्सन र कस्तुरी प्रोडक्सनको ब्यानरमा बन्ने ‘कल्ली’ मा पल र बेनिशा मुख्य भूमिकामा हुनेछन् । निर्माता किरण नेपालीको प्रस्तुतिमा तयार हुने चलचित्रमा लक्ष्मण सुनारको कथा तथा निर्देशन रहनेछ । महेश दवाडीको पटकथा तथा संवाद छ ।
यो चलचित्र चैत २९ गतेबाट रिलिज गर्ने घोषणा निर्माणपक्षले गरेको छ ।
यसैगरी, यस वर्ष बेनिशाले आफ्नो हिन्दी डेब्यु सिनेमा ‘दुर्गम’को छायांकनमा समेत समय दिनेछिन् । यो सिनेमाको केही प्रतिशत काम बाँकी रहेको बुझिएको छ ।
