कौतुहलता पैदा गराउँदै कृषा, प्रदीप र सौगातमा को हो ‘पिताम्बर’ ?
निर्देशक कृषा चौलागाईंले चलचित्र ‘पिताम्बर’मा स्टार कलाकारहरूलाई लिएर निर्देशन गर्दैछिन् । यो सिनेमामा प्रदीप खड्का, सौगात मल्लल, प्रमोद अग्रहरी, आँचल शर्मा, अनुपविक्रम शाही, सुरक्षा पन्त, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारी लगायतको कलाकारको अभिनय रहनेछ ।
सिनेमा भदौको पहिलो साताबाट दोस्रो चरणको छायांकनमा जाँदैछ । पहिलो चरणको छायांकन नवलपरासीको त्रिवेणी धाममा शुभमुहूर्त गर्दै सुरु भएको थियो ।
दोस्रो चरणको छायांकनको तयारी गरिएसँगै सिनेमाको यतिबेला वर्कसप भइरहेको छ । कलाकारको बलियो लाइनअपले चलचित्र ‘पिताम्बर केही फरक र स्पेसल रहने संकेत गरेको छ ।
साथै, अहिलेको समयका दुई सफल अभिनेता प्रदीप र सौगात पहिलो पटक एकसाथ देखिने भएकाले सिनेमाप्रति दर्शकमा चासो बढाएको छ । यी दुईमध्य यो सिनेमाको प्रमुख पात्र को हो ? भन्ने निर्माणपक्षले आजसम्म खुलाएको छैन ।
दुवै ‘स्टार’ वर्कसपमा व्यस्त छन्, तर बुधबार निर्देशक चौलागाइँले प्रदीप र सौगातसँगको एक तस्वीर सार्वजनिक गर्दै ‘पिताम्बर को हो ?’ भनेर प्रश्न गरेकी छन् ।
‘पिताम्बर’को मुख्य पात्र अर्थात् ‘पिताम्बर’ को हो प्रष्ट भने नपारेकी उनले प्रदीप र सौगात मध्ये पिताम्बर को हो ? भन्ने प्रश्न गरेकी हुन् । दुवै उत्तिकै सबल र स्टारडम भएकाले ‘पिताम्बर’को मुख्य पात्र ‘पिताम्बर’को हो ? भन्नेमा कौतुहलता छ । यो कौतुहलतालाई जोगाउने प्रयास निर्माण टिमले गरिरहेको छ । यसरी हेर्दा निर्देशक चौलागाईंले यस कौतुहलतालाई रिलिजसम्म कौहुलताको विषय बनाउने योजना देखिन्छ ।
केपी फिल्मस्ले पुरुषोत्तम प्रधान फिल्मस्सँग सहकार्य गरेको पिताम्बरलाई पुरुषोत्तम प्रधानले खिचिरहेका छन् । सिनेमाको निर्मातामा विशाल चौलागाईं छन् ।
प्रदीप भारद्धाजको लेखन रहेको सिनेमालाई निर्देशक चौलागाईंले लार्ज स्केल बनाउँदैछिन् । सिनेमाको बजेट ५ करोड अनुमान गरिएको छ । यसअघि उनले ‘ऐंचो पैंचो’ निर्देशन गरेकी थिइन् ।