सकियो ‘कार्साङ’को छायांकन, प्रदर्शन मिति कहिले ?
यम शेर्पाले निर्देशनमा निर्माण भएको चलचित्र ‘कार्साङ’को छायांकन २२ दिनमा सकिएको छ ।
चलचिको सिन्धुपाल्चोक जिल्लाको बाह्रबिसे नगरपालिका, भोटेकोसी गाउँपालिका क्षेत्रमा र बाँकी एक दृश्य खिचिएसँगै सम्पूर्ण छायांकन सकिएको निर्माण पक्षले जानकारी दिएको छ ।
कलाकारहरूको बलियो लाइनअप रहेको फिल्म ‘कार्साङ’लाई यार्सा फिल्मस् र पुरुषोत्तम प्रधान फिल्मसको प्रस्तुतिमा निर्माण गरिएको हो ।
यस चलचित्रमा दयाहाङ राई र सिर्जना निङ्लेखु, जितु नेपाल, दिया मास्के, बुद्धि तामाङ, प्रेम लोप्चन, डोमा ह्योल्मो, सृष्टि गौतम, छोकी शेर्पा, सुरवीर पण्डित र कर्मा शेर्पाको अभिनय रहेको छ । यस्तै बाल कलाकारमा राशी लिम्बु र सोहन थापाको पनि अभिनय रहेको छ ।
सिनेमाका मुख्य कलाकारहरु केही दिन अधि फिल्मको छायांकन सेटबाट क्यारेक्टर लुक्स सार्वजनिक गरिएको थियो, जसमा अभिनेता दयाहाङ र नव(अभिनेत्री सिर्जना निङ्लेखु देखिएका थिए । उक्त तस्वीरमा उनीहरुलाई रैथाने चरित्रमा रहेको अनुमान लगाउन सकिन्छ ।
दयाहाङ र सिर्जनाले फिल्ममा उनीहरू जोडीको भूमिका निर्वाह गरेका छन् । केही म्युजिक भिडियोमा काम गरेकी सिर्जनाको यो डेब्यु फिल्म हो ।
सामाजिक कथावस्तुमा निर्माण हुने यो चलचित्रमा निर्देशक शेर्पा स्वयंको कथा, पटकथा तथा संवाद रहेको छ। यसअघि थुप्रै सर्ट फिल्म निर्देशन गरिसकेका शेर्पाको यो डेब्यु निर्देशकीय सिनेमा हो ।
छायांकन सकिएसँगै निर्देशक शेर्पाले भने, ‘चलचित्रको सम्पूर्ण टिम राम्रो रहेकाले सबैको मेहनतका साथ समयमै छायांकन सम्पन्न गर्न पाइयो, अब पोस्टको काम त्यही अनुरूप गर्दैछौँ, सोचे जस्तै भयो भने हामी चाँडै प्रदर्शन गर्न सक्छौँ ।’
यस चलचित्रका निर्माता पुरूषोत्तम प्रधान हुन्। सिनेमामा उनकै डिओपी रहेको छ। चलचित्रका प्रोडक्सन म्यानेजर दिलीप पन्त हुन् ।
‘कार्साङ’ प्रदर्शन मिति भने तय गरिएको छैन। यो सिनेमाको देशभर वितरणको जिम्मेवारी आरआर फिल्म्स्ले लिएको छ ।