सलारको दोस्रो भाग अनिश्चित !
दक्षिण भारतीय अभिनेता प्रभासको २२ डिसेम्बरमा रिलिज भएको एक्शन प्याक सागा ‘सालार पार्ट १- सिजफायर’ ले बक्स अफिसमा सफल भएको थियो । प्रशान्त नीलको लेखन तथा निर्देशन रहेको यो फिल्मले विश्वभर ७५० करोड भारु कमाई गर्यो ।
योसँगै प्रभासको फिल्म ‘सलार पार्ट २- शौर्यांग पर्वम’ पनि बन्ने पक्का गरिएको थियो । तर, यसैबीच फिल्मको बारेमा एउटा ठूलो जानकारी बाहिर आएको छ, जसले फ्यानलाई चकित पार्ने निश्चित छ ।
सालार र शौर्यांग जनजातिबीचको द्वन्द्वलाई अझ गहिरो पार्ने वाचा गर्ने ‘सालार भाग २’ को सिक्वेलको प्रतीक्षा उच्च थियो । यसअघि पहिलो पार्टमा वरदाको भूमिका निर्वाह गरेका अभिनेता पृथ्वीराज सुकुमारनले सिक्वेलको स्क्रिप्ट अन्तिम चरणमा पुगेको र छायांकन पनि छिट्टै सुरु हुने बताएका थिए ।
तर, प्रभास र निर्देशक प्रशान्त नीलबीच फिल्मको कथाको विषयमा मतभेदका कारण बहुप्रतिक्षित सिक्वेल अनिश्चितकालका लागि स्थगित गरिएको छ । साथै, निर्देशक प्रशान्तले जुनियर एनटीआरसँगको प्रोजेक्टमा आफ्नो ध्यान केन्द्रित गरेपछि सलार-२ अझ अनिश्चित बनेको मिडिया रिपोर्टमा बताइएको छ ।
अभिनेता प्रभासका आगामी दिनमा ‘कल्की २८९८ एडी’, मारुतिसँग ‘राजु भाइ’ र सन्दीप रेड्डी वाङ्गा निर्देशित ‘स्पिरिट’ लगायतका फिल्म आउँदै छन् ।