सन्तोषले गरे प्रदीप खड्काको यसरी खुलेरै प्रशंसा
काठमाडौं । निर्माता तथा निर्देशक सन्तोष सेनले अभिनेता प्रदीप खड्काको अभिनयको खुलेरै तारिफ गरेका छन् । सन्तोष र प्रदीपवीच पछिल्लो समय सम्बन्ध चिसिएको खबरहरू आइरहेका बेला सन्तोषले प्रदीपको अभिनयको तारिफ गरेका हुन् ।
चलचित्र ‘पुजार सार्की’ हेरेपछि सन्तोषले सिनेमामा प्रदीप खड्काको पात्र प्रतिक्षित रहेको समेत बताएका छन् ।
“समयको व्यवस्थताको बाबजुद आज पुजार सार्की हेरियो । चलचित्र हेरेपछि दुई पात्र मैते र मेघराजका लागि एउटा कुरा भन्न मन लाग्यो वाउ ! पुजार सार्कीको शीर्ष भूमिका कसैको भए पनि सिन पछि सिन मैते र मेघराजको प्रतिक्षा बढी देखियो,” फेसबुकमा सन्तोष लेख्छन्, “पिके भाइको खुबी र परिकल्पना मैले धेरै नजिकबाट नियालेको छु । बजार जुनबेला जस्तो प्रस्तुतिमा रमाइरहेको हुन्छ त्यस्तै प्रस्तुति गर्ने क्षमता छ उसमा, मैले अद्भूत भनेको यसै होइन ।”
सन्तोषले पल शाहको अभिनयको पनि प्रशंसा गरेका छन् । पलको पात्रमा धेरै उतारचढाव नभए पनि सालिनताले पात्रलाई न्याय गरेको उनले बताएका छन् । “पल राजाको पात्रमा धेरै उतार–चढाव नभए पनि जुन सालिनताले पात्रलाई न्याय गर्नुभएको छ । हजुर पनि जे पनि गर्न सक्नुहुन्छ भन्ने प्रमाणित भयो । राम्रो छ भोलिबाट अझ धेरै राम्रो होस् शुभकामना !”