‘वान सिनेमाज’मा पाँच चलचित्र प्रदर्शन
मल्टिप्लेक्स हल ‘वान सिनेमाज‘ले यो हप्ताको प्रदर्शन सूचीमा दर्शकहरूको फरक फरक रुचिलाई ध्यानमा राखेर चलचित्रहरू समावेश गरेको छ।
वान सिनेमाजले आफ्नो आउटलेटमा दुई नेपाली सिनेमा, दुई भारतीय सिनेमा र एक हलिउड सिनेमा गरी शुक्रबार पाँच चलचित्र प्रदर्शन गराइरहेको हो ।
जसमा ‘देवी’ र ‘रावायण’, भारतीय सिनेमा ‘द ग्रेटेस्ट अफ अलटाइम’ र ‘स्त्री २’ र हलिउड सिनेमा ‘बिटलजुस बिटलजुस’ प्रदर्शन भइरहेका छन् ।
सञ्जोग राईको निर्देशनमा बनेको क्राइम थ्रिलर जानराको चलचित्र ‘देवी’मा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपाने, ध्रुव कोइराला, निरीक्षा घतानी, विशाल पहारी, निरु खड्का, जीवनजंग खड्का र विकास पन्तको अभिनय रहेको छ ।
अर्को चलचित्र ‘रावायण’ हो । सुदर्शन थापाको निर्देशन रहेको यो चलचित्रमा पल शाह, पूजा शर्मा, प्रियंका कार्की, प्रमोद अग्रहरि, निकिता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदीप ढकाललगायत कलाकारको अभिनय छ ।
दुई भारतीय सिनेमा मध्य दक्षिण भारतीय अभिनेता विजय थलापति स्टारर ‘द ग्रेटेस्ट अफ अलटाइम’ विहिबारदेखि नै रिलिज भएको हो । यो चलचित्रमा उनीसँगै मीनाक्षी चौधरी, प्रशान्त, प्रभु देवा, अजमल अमिर, योगी बाबु, त्रिशा कृष्णन, शिवकार्तिकेयनको महत्त्वपूर्ण भूमिका छ । यस सिनेमामा स्वर्गीय अभिनेता विजयकान्तलाई पनि एआई मार्फत दर्शक माझ ल्याइएको छ ।
हलिउडको प्रतिनिधित्व गर्दै ‘बिटलजुस बिटलजुस’ पनि प्रदर्शनमा रहेको छ। यो चलचित्रले हास्य र डरको अनौठो मिश्रण प्रस्तुत गर्दछ।
अर्को भारतीय सिनेमा ‘स्त्री २’ यस अघि देखिनै प्रदर्शन भइरहेको चलचित्र हो ।