सलोनले चलचित्र ‘रंगी’ बनाउने, सुरेशले निर्देशनमा डेब्यु गर्दै
काठमाडौं । नयाँ नेपाली चलचित्र ‘रंगी’ निर्माण हुने भएको छ।
सलोन सलिना फिल्मस् प्रालिको ब्यानरमा निर्माण गरिने यो चलचित्रको सोमबार थिम पोस्टर सार्वजनिक गर्दै घोषणा गरिएको हो ।
सलोन बस्नेत प्रस्तुतकर्ता रहने यस चलचित्रको निर्देशन सुरेश न्यौपानेले गर्नेछन्, जसले यसअघि ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, ‘कृ’ लगायतका सिनेमामा मुख्य सहायक निर्देशकको अनुभव संगालेका छन्।
आगामी असोज ११ गतेदेखि काठमाडौंबाट छायांकन सुरु हुन लागेको चलचित्रका लागि केही दिनमा कलाकार फाइनल हुने जनाइएको छ ।
चलचित्रको सार्वजनिक टाइटल पोस्टरमा साइकलमा बसेकी एक बालिका र खेल्दै गरेको एक पुरुष देखिन्छन्, जो सम्भवतः बाबु-छोरी हुन्। साथै, पोस्टरमा सूर्यास्तको दृश्यसमेत समेटिएको छ, जसले बाबु-छोरीको कथालाई केन्द्रमा राखेर सिनेमा बन्ने संकेत गर्छ।
सक्षम सुवेदीको निर्माणमा बन्ने यस चलचित्रको लेखन सुमन गजमेरले गरेका छन् भने छायांकन सौरभ लामाले गर्ने भएका छन्।