फ्राइडे रिलिज : हलमा मीन भामको ‘शाम्बाला’
फ्राइडे रिलिज अन्तर्गत आज शुक्रबारबाट नयाँ नेपाली चलचित्र प्रदर्शनमा आएको छ । चर्चित निर्देशक मीन भामको दोस्रो निर्देशकिय चलचित्र ‘शाम्बाला’ प्रदर्शनमा आएको हो ।
तिब्बती भाषामा प्रदर्शन भएको चलचित्रलाई नेपालमा अंग्रेजी र नेपाली सबटाइटलमा प्रदर्शन गरिएको छ । दुई दिन अघिबाटै अग्रिम बुकिङ खुलाइएको यस चलचित्रलाई देशकै ठूलो चेन क्यूएफएक्सले उत्साहजनक सो दिएको छ।
क्यूएफएक्सले काठमाडौं उपत्यका र बाहिर गरेर जम्मा ४५ शो दिएकाे छ । अन्य मल्टिप्लेक्स हलहरुले पनि यसलाई राम्रो शो उपलब्ध गराएका छन् ।
विश्वप्रसिद्ध चलचित्र महोत्सवहरूमा पुगिसकेको ‘साम्बाला’मा तिब्बतीय जनजीवन समेटिएको छ । यो सिनेमामा बहुपति विवाहित एक गर्भवती महिलाले व्यापार गर्न ल्हासा पुगेर बेपत्ता भएका श्रीमान् खोज्दा भोग्नुपरेको कष्टकर यात्रा प्रस्तुत गरिएको छ ।
चलचित्रमा थिन्ले ल्हामो, सोनम तोपदेन, कर्मा शाक्यलगायतको अभिनय रहेको छ । सिनेमाको कथा मिन भाम र अभिनास विक्रम शाहले लेखेका हुन् ।
प्रदर्शन अघि यो चलचित्रको गत आइतबार काठमाडौँमा प्रिमियर गरिएको थियो। जहाँ बलिउड निर्देशक अनुराग कश्यप र अभिनेता नवाजुद्दीन सिद्दीकी सहभागी भएका थिए।
यस्तै, यो सिनेमाले अर्को वर्ष अमेरिकामा हुने ओस्कार अवार्डको ९७ औं संस्करणका लागि नेपालबाट प्रतिनिधित्व गर्ने भएको छ । ओस्कारमा नेपालबाट ‘शाम्बाला’ले प्रतिनिधित्व गर्ने भएको निर्माताले जानकारी दिएका हुन् ।