बेनिशाले किनिन् विद्युतीय कार, ड्राइभ गर्दै ‘एक्लो’को छायांकन सेटमा
नायिका बेनिशा हमालले विद्युतीय गाडी किनेकी छिन् । उनले सामाजिक सञ्जालमार्फत आफ्नो नयाँ गाडीको तस्बिर सार्वजनिक गर्दै खुसी व्यक्त गरेकी छन् । गत आइतबार उनले झण्डै ६२ लाख रुपैयाँ पर्ने ओमोडा ब्राण्डको विद्युतीय कार खरिद गरेकी हुन् ।
हमालले शुक्रबार फेसबुकमा गाडीको तस्बिर पोस्ट गर्दै लेखेकी छन्, ‘माइ न्यू बेबी केम होम’ (मेरो नयाँ बच्चा घर आयो) । साथै उनले लेखेकी छिन्, ‘इलेक्ट्रिकमा स्विच गर्नुहोस् र आफ्नो ड्राइभलाई पावर गर्नुहोस्’, उनले अरुलाई पनि विद्युतीय सवारी साधन प्रयोग गर्न प्रेरित गरेकी छिन् ।
हाल चलचित्र ‘एक्लो’ को छायांकनका लागि जोमसोममा रहेकी बेनिशाले उक्त सिनेमाको सेटसम्म सोही गाडीमा यात्रा गरेकी थिइन् । यो बेनिशाको दोस्रो चारपांग्रे सवारी हो । यसअघि उनले पेट्रोलबाट चल्ने कार प्रयोग गर्थिन् ।
पछिल्लो समयमा विद्युतीय गाडीप्रतिको आकर्षण सेलिब्रेटीहरुमा बढ्दो क्रममा रहेको छ । विद्युतीय सवारीले वातावरणमा पर्ने सकारात्मक प्रभाव र ईन्धनको खर्च कटौती जस्ता फाइदाहरुले गर्दा नेपाली सेलिब्रेटीहरुमाझ यसको लोकप्रियता बढ्दै गएको देखिन्छ ।
बेनिशाको कामको कुरा गर्दा उनी ‘एक्लो’ पछि ‘कल्ली’ र ‘मोहोर’ चलचित्रको छायांकनमा व्यस्त हुनेछिन् । ‘एक्लो’मा उनको जोडी अभिनेता प्रदीप खड्कासँग बाँधिने छ भने ‘कल्ली’ र ‘मोहर’मा अभिनेता पल शाहसँग सहकार्य गर्दै छिन् ।