‘एक्टर’का तीन नयाँ पोस्टर सार्वजनिक, आना र दिव्यासँग प्रदीपको प्रेमभाव
काठमाडौं । राजन भुसालको डेब्यु निर्देशनमा बनेको चलचित्र ‘एक्टर: टेक वान’ को तीन नयाँ पोस्टरहरू सार्वजनिक गरिएका छन्।
रोयल भिमसेन र ट्राइडेन्ट कन्सेप्ट टिमद्वारा डिजाइन गरिएका यी पोस्टरहरूमा सिनेमाका मुख्य कलाकारहरू प्रदिप खड्का, आना शर्मा, र दिव्या रायमाझी फिचर्ड छन्।
चलचित्र त्रिकोणात्मक प्रेमकथामा आधारित रहेको अनुमान लगाउन सकिने एक पोस्टरमा प्रदिप खड्कालाई आना शर्मा र दिव्या रायमाझीको बीचमा देख्न सकिन्छ भने, अन्य दुई पोस्टरमा प्रदिपलाई दुबै अभिनेत्रीहरूसँग रोमान्टिक अवतारमा प्रस्तुत गरिएको छ।
थम्मन कुमार भण्डारीको निर्माणमा बनेको यस सिनेमामा प्रदिप, आना र दिव्यासँगै राजबल्लभ कोइराला, दिव्य देव, उषा रजक, र सुशील सिटौला लगायतका कलाकारहरूको समेत अभिनय रहेको छ।
अभिनेता दीलिप रायमाझीकी छोरी दिव्याले यही चलचित्रबाट अभिनेत्रीको रुपमा डेब्यु गरेकी हुन् ।
अदृत फिल्मस् र मोती फिल्मस्को संयुक्त प्रस्तुतिमा बनेको यस सिनेमाका अनिश भुसाल सह–निर्माता र क्रियटिभ प्रोड्युसर मोती कार्की हुन्।
चलचित्रको कथा आकाश बराल र राजन भुसालले संयुक्त रूपमा लेखेका हुन्। सिनेमामा नरेन्द्र मैनालीको छायांकन, निमेश श्रेष्ठको सम्पादन, हर्कुलस बस्नेत, रोहित शाक्य, र एलिस कार्कीको संगीत, शिशिर खाती र किरण थापाको कोरियोग्राफी, अष्ट महर्जनको द्वन्द्व निर्देशन तथा राजेन्द्र मोक्तानको रंग संयोजन छ ।
‘एक्टर: टेक वान’ आगामी कार्तिक १५ गते लक्ष्मी पूजाको दिन रिलिज हुनेछ।