‘सानो संसार’को रिलिज स्थगन
काठमाडौं । चलचित्र ‘सानो संसार’ले रिलिज स्थगन गरेको छ । शुक्रबारबाट रिलिज भएको चलचित्र लगातारको वर्षाले सिर्जित विपत्तिलाई ध्यानमा राख्दै स्थगन भएको हो ।
“हाम्रो चलचित्र सानो संसार असोज ११ गतेबाट नेपालभर प्रदर्शनमा आएको छ । तर हालको बाढी पहिरो र प्राकृतिक विपत्तिको कारण जनमानसलाई आवतजावत गर्न समेत कठिन भएकाले सबैभन्दा पहिला आम मानिसको जनधनको सुरक्षालाई पहिलो प्राथमिकतामा राखेर हामीले हाललाई हाम्रो चलचित्र केही समयको लागि प्रदर्शन स्थगित गरेका छौँ,” आज विज्ञप्ति जारी गर्दै निर्माणपक्षले भनेको छ, “आगामी दिनमा सहज वातावरण भएपछि पुनः प्रदर्शनमा लिएर आउने वाचासहित यसबाट पर्न गएको असुविधाप्रति प्रदर्शक र दर्शकमा हामी क्षमा प्रार्थी छौँ ।”
चलचित्र ‘सानो संसार’लाई अर्जुन कुमार र माधव वाग्लेले निर्माण गरेका हुन् ।
‘सानो संसार’ पारिवारिक कथावस्तुमा निर्माण भएको चलचित्र हो । यसमा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेनाको मुख्य भूमिका रहेको छ ।
उनीसँगै राज पंगेनी शर्मा, अनु दाहाल, अन्जसा रिजाल शिशिर सिवाकोटी, सरिता भण्डारी र जीवन गौतमको अभिनय रहेको छ । यी सवै कलाकारले नेपाली रजतपटमा डेव्यु गरेका छन् ।
राजधानी मिडिया एड प्रोडक्सन र प्रिन्सेस मूभिजको व्यानरमा सिनेमा निर्माण भएको छ ।
सिद्धार्थ पुडासैनीले सिनेमालाई निर्देशन गरेका हुन् । यही सिनेमाबाट उनले लेखन तथा निर्देशनमा डेव्यु गर्दैछन् । उनलाई सिनेमाको कथा लेखनमा सरिष्मा खत्रीले सघाएकी छन् ।
प्रवीन खड्काको छायांकन र रोमी तन्डुकारको सम्पादन रहेको सिनेमाको डिजिटल पाटर्नर म्युजिक नेपाल र क्रिएटिभ पाटर्नर टुनामुना कन्सेप्ट हो ।