‘फिरफिरे फिरिरी’को शीर्षक गीतमा पात्रहरुबीचको प्रेम
काठमाडौं । हरर कमेडी जनरामा निर्माण भएको चलचित्र ‘फिरफिरे फिरिरी’ को पहिलो गीत सार्वजनिक भएको छ ।
छठ पर्वको विदा पारेर आगामी कात्तिक २२ गतेदेखि प्रदर्शनको तयारीमा रहेको चलचित्रको सार्वजनिक भएको शीर्षक गीतमा प्रशान्त सिवाकोटीको शब्द र संगीत रहेको छ भने स्वर भरत अधिकारी, प्रशान्त सिवाकोटी, टिकराम श्रेष्ठ, र रोषा फुयाँलले दिएका छन्।
म्युजिक नेपालको आधिकारिक युट्युब च्यानलमार्फत सार्वजनिक गरिएको गीतको भिडियोमा चलचित्रका प्रमुख पात्रहरूलाई फिचर गरिएको छ । गीतमा पात्रहरूबीचको प्रेम र रोमान्टिक भावलाई प्रस्तुत गरिएको छ।
बिन्दबासिनी क्रियसनको ब्यानरमा निर्माण गरिएको यस चलचित्रका निर्माता मनोज कुमार अधिकारी हुन्, जो लगभग १५ वर्षपछि फेरी चलचित्र निर्माणमा फर्किएका छन् । अधिकारीले यसअघि ‘नौ डाँडा पारी’ र ‘मंगलसुत्र’ जस्ता चलचित्र निर्माण गरेका थिए ।
चलचित्रको लेखन सन्दिप श्रेष्ठ र नबिन भट्टले गरेका हुन्। निर्माण टिमले चलचित्रले दर्शकलाई भरपूर मनोरञ्जन दिने विश्वास व्यक्त गरेको छ । यस चलचित्रमार्फत सन्दीप श्रेष्ठ र भावना उप्रेतीले नेपाली फिल्म क्षेत्रमा डेब्यु गर्दैछन् ।
चलचित्रका अन्य प्रमुख कलाकारहरूमा शंकर सेढाई, पिटर प्रिन्स, रबिना केसी, पुष्प अवस्थी, र सूर्यमान लिम्बु रहेका छन् । चलचित्रको छायांकन जितु तामाङले गरेका छन् भने सहायक निर्देशनमा रोशन दास, प्रकाश दाहाल, र अग्नि सुबेदी छन् ।
चलचित्रमा केशव राज भट्टले कोरियोग्राफी गरेका छन् भने ब्याकग्राउण्ड म्युजिक एलिस कार्कीको छ। सम्पादन र कलर संयोजन अनन्त घिमिरेले गरेका छन्, जसले चलचित्रको पोस्टर डिजाइन समेत गरेका छन् ।
आर.आर फिल्म्सले देशभर चलचित्रको वितरण गर्नेछ ।