‘कमेडी दरबार’ लिएर प्रदीप, अन्ना र दिव्याले देशव्यापी प्रचार टुर गर्ने
काठमाडौं । यस वर्षको लक्ष्मीपूजाको दिन अर्थात् कार्तिक १५ गते रिलिज हुन लागेको चलचित्र ‘एक्टर: टेक वन’ ले ‘कमेडी दरबार’सँग सहकार्य गर्दै राष्ट्रिय स्तरको प्रचारात्मक टुर आयोजना गर्ने भएको छ ।
कार्तिक १ देखि ७ गतेसम्म हुने प्रचारात्मक यो टुर काठमाडौं उपत्यका बाहिरका मुख्य सहरहरू इटहरी, नारायणगढ, बुटवल, नेपालगन्ज, दाङ, र पोखरामा सम्पन्न हुनेछ ।
इटहरीबाट सुरु हुने यो टुर क्रमशः नारायणगढ, बुटवल, नेपालगन्ज, तुलसीपुर, र पोखरामा पुग्नेछ । निर्माता थमन कुमार भण्डारीका अनुसार कार्यक्रममा स्थानीय प्रतिभाहरूलाई पनि प्रस्तुति दिन मौका दिइनेछ । लिभेन्ट्स स्टुडियोजले व्यवस्थापन गर्ने यो कार्यक्रम सबैका लागि खुला र निःशुल्क रहनेछ ।
चलचित्रका प्रमुख कलाकारहरू प्रदीप खड्का, अन्ना शर्मा र दिव्या रायमाझी टुरमा सहभागी हुनेछन् भने कमेडी दरबारका चर्चित हास्य कलाकारहरू सुन्दर खनाल, पवन खतिवडा (म्याकुरी), हिमेश पन्त, सरोज भण्डारी, उत्सव सापकोटा लगायतको मनोरञ्जनात्मक प्रस्तुति रहनेछ ।
‘अदृत फिल्म्स’ र ‘मोती फिल्म्स’को संयुक्त प्रस्तुति रहेको चलचित्रमा प्रदीप खड्का, राजबल्लभ कोइराला, अन्ना शर्मा, दिव्या रायमाझी, दिव्य देव, उषा रजक, र सुशील सिटौलालगायतका कलाकारहरूको अभिनय रहेको छ । चलचित्रको निर्देशन राजन भुसालले गरेका छन् भने कथा आकाश बराल र राजन भुसालले लेखेका हुन्।
यो चलचित्रमा नरेन्द्र मैनालीको छायाङ्कन, निमेष श्रेष्ठको सम्पादन, र हर्कुलस बस्नेत, रोहित शाक्य र एलिस कार्कीको सङ्गीत रहेको छ।
प्रचारात्मक टुरले चलचित्रप्रति दर्शकहरूको चासो बढाउने अपेक्षा गरिएको छ ।