‘फिरफिरे फिरिरी’को आइटम गीतमा अलिशाको आकर्षक नृत्य
काठमाडौं। चलचित्र ‘फिरफिरे फिरिरी’ को आइटम गीत सार्वजनिक भएको छ ।
छठ पर्वको दिन पारेर आगामी कात्तिक २२ गतेबाट प्रदर्शनमा आउने तयारीमा रहेको हरर-कमेडी सिनेमाको ‘टिमिक्कै चोली’ बोलको नयाँ आइटम गीत आज सार्वजनिक भएको हो ।
गायिका अनु चौधरीको स्वरमा रहेको आइटम गीतमा प्रशान्त सिवाकोटीको शब्द र संगीत रहेको छ । यो गीतमा मोडल अलिशा शर्माले आकर्षक नृत्य प्रस्तुत गरेकी छन् ।
चलचित्र ‘फिरफिरे फिरिरी’ बिन्दबासिनी क्रियसनको ब्यानरमा निर्माण गरिएको हो, जसको निर्माणकर्ता मनोज कुमार अधिकारी हुन् । अधिकारीले यसअघि ‘नौ डाँडा पारी’ र ‘मंगलसुत्र’ जस्ता चलचित्रहरूको निर्माण र अभिनय गरेर आफूलाई परिचित गराइसकेका छन् । चलचित्रमा नितिश पुन सह-निर्माताको भूमिकामा रहेका छन् ।
निर्देशक नबिन भट्टको यो पहिलो निर्देशकीय सिनेमा हो । चलचित्रको कथा लेखन सन्दिप श्रेष्ठ र नबिन भट्टले गरेका हुन् । यस चलचित्रबाट सन्दीप श्रेष्ठ र भावना उप्रेतीले नेपाली फिल्म उद्योगमा डेब्यु गर्दैछन् ।
प्रमुख कलाकारहरूमा मनोज कुमार अधिकारी, सन्दिप श्रेष्ठ, भावना उप्रेती, रबिना केसी, पुष्प अवस्थी, र सूर्यमान लिम्बुको नाम समावेश छ।
प्राविधिक पक्षमा जितु तामाङले छायांकनको जिम्मेवारी सम्हालेका छन्, भने रोशन दास, प्रकाश दाहाल र अग्नि सुबेदी सहायक निर्देशकको भूमिकामा छन् । केशव राज भट्टले कोरियोग्राफी गरेका छन्, र एलिस कार्कीले ब्याकराउण्ड म्युजिक दिएका छन् । अमित श्रेष्ठले साउण्ड डिजाइन गरेका छन्, जबकि अनन्त घिमिरेले सम्पादन र कलर संयोजनको जिम्मेवारी सम्हालेका छन् ।
विशेषगरी हरर कमेडी विधाले हालसालै दर्शकहरूबाट राम्रो प्रतिक्रिया पाइरहेकाले चलचित्रले हेरुञ्जेल दर्शकलाई भरपुर मनोरञ्जन दिने विश्वास निर्माता अधिकारीले व्यक्त गरेका छन् ।
चलचित्रलाई देशभर आर.आर फिल्म्सले वितरण गर्नेछ ।