‘कर्मा’ले लियो रिलिज डेट, विपीन कार्की एक्शन अवतारमा देखिँदै
काठमाडौं । चलचित्र ‘कर्मा’ले रिलिज डेट घोषणा गरेको छ । निर्माणपक्षका अनुसार ‘कर्मा’ चैत २९ गते प्रदर्शनमा आउनेछ ।
अनाउन्समेन्ट डेट सार्वजनिक गर्दै निर्माणपक्षले विपीन कार्की मुख्य भूमिकामा रहेको पोस्टरमार्फत् जानकारी दिएको छ । अनाउन्समेन्ट पोस्टरमा विपीन जिममा रहेको देखिन्छ । यसले उनी शारीरिक रुपमा फिट बडीसहितको भूमिकामा चलचित्रमा रहेको देखाउँछ ।
गतवर्षको फागुन १८ गते प्रदर्शनमा आएको चलचित्र ‘अगस्त्य : च्याप्टर–१’लाई निर्देशन गरेर तारिफ कमाएका निर्देशक सौरभ चौधरीले ‘कर्मा’ निर्देशन गर्दैछन् ।
सौरभले निर्देशन गर्ने यस चलचित्रको कथा पनि उनी स्वयंले लेखेका छन् । यो चलचित्र एक्सन ड्रामा जनरामा निर्माण हुनेछ ।
निर्देशक चौधरीको तेस्रो प्रोजेक्ट हो । तीन वर्षअघि उनी निर्देशित ‘लभ डायरिज’ रिलिज भएको थियो ।
आर्टिस्टिक इनटरटेनमेन्टको प्रस्तुति रहने चलचित्रमा बसन्त लम्सालले लगानी गर्नेछन् । यो चलचित्रको छायांकन मङसिर दोस्रो सातापछि सुरु हुनेछ ।
चलचित्रको कथावस्तु र अन्य कलाकारबारे निर्माणपक्षले अहिले जानकारी दिएको छैन । कलाकार अनुबन्ध गर्ने क्रम जारी नै रहेकाले पछि जानकारी गराउने निर्देशक चौधरीले जानकारी दिए ।
सौरभले ‘अगस्त्य : च्याप्टर–१’ बाट मेकिङमा गरेको मेहनतको तारिफ भएको थियो ।
