प्रेम, द्वन्द्व र रहस्य केन्द्रित ‘मिसिङ: केटी हराएको सूचना’को दोस्रो टिजर
काठमाडौं । चलचित्र ‘मिसिङ: केटी हराएको सूचना’ को दोस्रो टिजर सार्वजनिक भएको छ ।
प्रेमको उतारचढाव, द्वन्द्व, र रहस्यलाई विशेष ढंगले उजागर गरिएको टिजरमा चलचित्रका मुख्य कलाकार नाजिर हुसेन र सृष्टि श्रेष्ठबीचको प्रेमकथा प्रस्तुत गरिएको छ ।
दोस्रो टिजरमा नाजिर र सृष्टिको सम्बन्धमा थप जटिलता र पेचिलो मोडहरू देख्न सकिन्छ । टिजरको अन्त्यमा सृष्टिले नाजिरलाई अपहरण गरेको दृश्य देखाइन्छ, जसले पहिलो टिजरको विपरीत दृश्यलाई स्पष्ट पार्छ । पहिलो टिजरमा नाजिरले सृष्टिलाई अपहरण गरेको देखाइएको थियो । यो अप्रत्याशित मोडले चलचित्रप्रति दर्शकको उत्सुकता झन् बढाएको छ ।
चलचित्रको निर्देशन ३२ वर्षअघि चर्चित डकु-ड्रामा ‘उजेली’का निर्देशक दीपेन्द्र गौचनले गरेका हुन् । उनले नै चलचित्रको स्क्रिप्ट लेखन गरेका छन् ।
चलचित्रमा नाजिर र सृष्टिका अलावा सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, र अन्य कलाकारहरूले अभिनय गरेका छन्। अमितेष शाह विशेष भूमिकामा देखिनेछन् ।
चलचित्रको छायांकन अमर महर्जनले गरेका हुन् भने निमेष श्रेष्ठले सम्पादन गरेका छन् । संगीतकार प्रवेश मल्लिक, करुण थापा, र दीपेन्द्र गौचनको संगीतमा रोहित जोन क्षेत्री, नेहा प्रियदर्शनी, इन्दिरा जोशी लगायतका गायकले स्वर दिएका छन् ।
ट्राई सिटी पिक्चर्स प्रस्तुतकर्ता रहेको यो चलचित्र कात्तिक ३० गते प्रदर्शनमा आउने तयारीमा छ ।