हलबाट उतारिएको निश्चल र स्वस्तिमाको ‘बेहुली फ्रम मेघौली’ ओटीटीमा रिलिज
काठमाडौं । सिनेमा हलमा हलमा चल्दाचल्दै उतारिएको चलचित्र ‘बेहुली फ्रम मेघौली’ आजबाट डिजिटल प्लेटफर्मममा रिलिज भएको छ ।
निश्चल बस्नेत र स्वस्तिमा खड्का मुख्य भूमिकामा रहेको चलचित्र ओटीटी प्लेटफर्म एमएसएम भिडियोमा रिलिज गरिएको हो । अब यो एमएसएम भिडियो एप डाउनलोड गरेर यो चलचित्र संसारभर हेर्न सकिनेछ ।
आफ्नो चलचित्र हलमा फूलअकुपेन्सीमा चलिरहे पनि शो भने दर्शक नै नआएको हिन्दी सिनेमालाई दिएको भन्दै निश्चलले हलबाट सिनेमा उतारेका थिए ।
आफ्नो सिनेमा ‘बेहुली फ्रम मेघौली’लाई शो नदिएर दर्शक नै नपाएको ‘जिग्रा’लाई शो उपलब्ध गराएको भन्दै उनले अब हलको विकल्प खोज्ने भन्दै सिनेमा हलबाट उतारेका थिए । नेपालीभन्दा बलिउड सिनेमालाई प्राथमिकता दिएको भन्दै उनले चर्को असन्तुष्टि जनाएका थिए ।
हालसम्मकै उच्च शो पाएको सिनेमाले राम्रै कलेक्सन गर्दागर्दै शो नदिएपछि उनले असन्तुष्टि जनाएका थिए ।
‘बेहुली फ्रम मेघौली’ अहिले जापान, यूएसए, क्यानडा र सिंगापुरमा भने हलमै चलिरहेको निश्चलले बताएका छन् ।
चलचित्रमा निश्चल बस्नेत र स्वस्तिमा खड्कासँगै बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ ।
निश्चल अर्थात् एक क्रान्तिकारी लडाकु
ब्ल्याक हर्स पिक्चर्स र मेघौली फिल्मसको ब्यानरमा निर्माण भएको सिनेमामा सजन काफ्ले र आकाश बरालको लेखन तथा निर्देशन रहेको छ । यो उनीहरुको डेव्यु निर्देशकीय सिनेमा हो ।
अभिनेत्री स्वस्तिमा खड्कालाई निर्माणमा निर्देशक तथा श्रीमान निश्चल बस्नेतले सघाएका छन् । सिनेमाका कार्यकारी निर्माता फिरोज खड्का र शंकर पाण्डे हुन् ।
अभिनेता विजय बराल कास्टिङ डिरेक्टर रहेको सिनेमामा नरेन्द्र मैनालीको छायांकन, प्रदीप लामा र केवीका खत्रीको कोरियोग्रफी, जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन छ ।