किन लाग्यो साउदी अरबमा ‘सिंघम अगेन’ र ‘भूल भुलैया- ३’ माथी प्रतिबन्ध ?
काठमाडौं । बलिउड चलचित्र ‘सिंघम अगेन’ र ‘भूल भुलैया-३’ लाई साउदी अरेबियामा प्रतिबन्ध लगाइएको छ ।
शुक्रबारदेखि विश्वभर प्रदर्शनमा आएका बलिउडका लोकप्रिय निर्देशक रोहित शेट्टीद्वारा निर्देशित ‘सिंघम अगेन’ र अनिस बज्मीको निर्देशनमा बनेको सिनेमा ‘भूल भुलैया ३’लाई साउदी अरेबियामा प्रतिबन्ध लगाइएको हो ।
रिपोर्ट अनुसार, साउदी अधिकारीहरूले ‘सिंघम अगेन’मा धार्मिक द्वन्द्वको चित्रण भएको र ‘भूल भुलैया ३’मा समलैंगिकताको सन्दर्भ भएको भन्दै प्रतिबन्ध लगाएका छन् ।
साउदी अरेबियामा यस किसिमको विषयवस्तु भएका चलचित्रहरूमा प्रतिबन्ध लगाउने परिपाटी पहिलेदेखि नै कायम छ । खाडी राष्ट्रहरूले राष्ट्रवादी तत्वहरू, धार्मिक वा यौन सामग्री भएका चलचित्रहरूलाई आफ्नो समाजमा देखाउन अनुमति दिँदैनन् ।
यी दुवै चलचित्रलाई साउदी अरेबियामा देखाउन नपाइने भएपछि निर्माताहरुलाई ठूलो झट्का लागेको छ । प्रतिबन्धको कारणले साउदी अरबका दर्शकले यी चर्चित भारतीय फिल्म हेर्नबाट वञ्चित हुनेछन् । यद्यपि, खाडीका अन्य देशहरूमा भने ‘सिंघम अगेन’ र ‘भूल भुलैया-३’ प्रदर्शन हुने बताइएको छ ।
यी सिनेमा भारतलगायत अन्य मुलुकमा भने ठूलो अपेक्षाका साथ रिलिज हुँदैछन् ।
साम्बा, सूर्यबँशी र सिंघमको कथालाई मिश्रण गरेर यी तीन चलचित्रको फ्रेन्चाईजको रुपमा नयाँ चलचित्र ‘सिंघम अगेन’ निर्माण गरिएको हो । रोहित सेठ्ठीले सिंघम र सिंघम रिर्टन्सको सफलतापछि तेश्रो सिक्वेलको रुपमा सिंघम अगेन निर्माण गरेका हुन् । यो चलचित्रमा तीन चलचित्रका तीन अभिनेता सिंघम सिक्वेलका अजय देवगन, सूर्यबँशीका अजय कुमार र साम्बाका रणबीर सिंहबीच प्रतिस्पर्धा देख्न पाईने छ ।
निर्देशक रोहित सेठ्ठीको कप युनिभर्स अन्तर्गतको यो पाँचौ चलचित्र हो । चलचित्रमा उनका यी युनभर्स बान्डका बिगतका चार चलचित्रका कथा जोडिएको छ । भारतीय चलचित्रको इतिहासमै यो एउटा ठुलो प्रयोग भएको निर्देशक रोहितको दाबी छ । जसमा टाईगर श्राफ, अर्जुन कपुर, बिक्की कौशल, दीपिका पादुकोण, करिना कपुर, जैकी श्राफजस्ता स्टार कलाकार पनि छन् ।
भुल भुलैयाको दुई सिक्वेलको सफलतापछि यो तेश्रो सिक्वेल हो । निर्देशक अनिश बज्मीको यो चलिचत्रमा दुई सिक्वेलकी अभिनेत्री विधा बालन, कलाकार राजपाल यादवसँगै यो सिक्वेलमा कार्तिक आर्यन, तृप्ती धिम्री, माधुरी दिक्षित, बिजयराज, सञ्जय मिश्रसहितका कलाकार रहेका छन् ।
विशेषगरि, यस वर्षको दीपावलीको अवसर पारेर नोभेम्बर १ मा रिलिज भएसँगै बक्स अफिसमा अजय देवगन र कार्तिक आर्यन भिड्दैछन् ।