दोस्रो सातामा प्रवेश गरेसँगै ‘पूर्ण बहादुरको सारङ्गी’को गीत ‘नोटैले…’ सार्वजनिक
काठमाडौं । कात्तिक १५ गते लक्ष्मीपूजाको दिनबाट रिलिज भएको चलचित्र ‘पूर्ण बहादुरको सारङ्गी’ दोस्रो सातामा प्रवेश गरेको छ ।
बिहीबारदेखि दोस्रो सातामा प्रवेश गरेसँगै निर्माण पक्षले चलचित्रको ‘नोटैले’ बोलको नयाँ गीत सार्वजनिक गरेको छ । सिनेमामा रहेको अभाव र त्यसको प्रभाव गीतले बोलेको छ ।
प्रशान्त शिवाकोटीको शब्द, संगीत र स्वर रहेको गीतमा विजय बराल र देशभक्त खनालको अभिनय छ । गीतले पैसाको अभावमा ज्यान गुमाउने पर्ने गन्धर्व समुदायको पीडा र त्यसले परिवारमा पारेको प्रभावलाई देखाउने प्रयास गरेको छ ।
हाल प्रदर्शनरत यो सिनेमाले आक्रामक व्यापार गरिरहेको छ । ‘पूर्ण बहादुरको सारङ्गी’लाई हलहरुले बिहानदेखि मध्यरातिसम्मको शो दिएका छन् ।
यस्तै, निर्माताले बिहीबार यो सिनेमाको पहिलो साताको कमाइ सार्वजनिक गरेका छन् । सिनेमाले सात दिनमा ८ करोड २५ लाख रूपैयाँ ग्रस कलेक्सन गरेको छ ।
सरोज पौडेलले निर्देशन गरेको चलचित्रमा विजय बराल, प्रकाश सपूत, मुकुन भुसाल, अञ्जना बराइलीलगायत कलाकारको मुख्य भूमिका छ ।
चलचित्रमा संवाद महेश दवाडीले लेखेका छन् । सेभेन सिस सिनेमा र बासुरी फिल्मसको प्रस्तुति रहेको सिनेमाका निर्माता विनोद पौडेल र प्याट्रिक सुवेदी हुन् । कार्यकारी निर्मातामा रमेश चौलागाईं, हरि श्रेष्ठ र रमेश ढकाल छन् ।