पुरानो भिडियोले भाइरल रश्मिका मन्दाना
काठमाडौं । साउथ भारतीय सिनेमाकी चर्चित अभिनेत्री रश्मिका मन्दानाको एउटा भिडियो हालै सामाजिक सञ्जालमा भाइरल भइरहेको छ ।
वास्तवमा यो भिडियो ८ वर्ष पुरानो हो । भिडियोमा उनलाई अभिनेता रक्षित शेट्टीसँग इन्गेजमेन्ट गरेको देख्न सकिन्छ । यो भिडियोमा उनीहरू एकअर्कालाई औंठी लगाइदिइरहेको देख्न सकिन्छ ।
रश्मिकाले सन् २०१६ मा रक्षित शेट्टीसँग कन्नड चलचित्र ‘किरिक पार्टी’ मार्फत अभिनय यात्राको सुरुवात गरेकी थिइन् । उक्त सिनेमाको सुटिङका क्रममा रश्मिका र रक्षितबीच प्रेम सम्बन्ध सुरु भएको थियो । यसै सम्बन्धलाई औपचारिकता दिँदै दुवैले ३ जुलाई २०१७ मा इन्गेजमेन्ट गरेका थिए ।
इन्गेजमेन्टका समयमा रश्मिका २१ वर्षकी थिइन् भने रक्षित ३४ वर्षका थिए । उनीहरूको उमेरमा १३ वर्षको अन्तर भए पनि प्रेमले यी दुईलाई जोडेको थियो । तर, दुर्भाग्यवश, यो सम्बन्ध लामो समय टिक्न सकेन । सेप्टेम्बर २०१८ मा रश्मिका र रक्षितले आफ्नो इन्गेजमेन्ट तोड्ने निर्णय गरेका थिए । उनीहरूले सम्बन्ध टुट्नुको कारणबारे कहिल्यै खुलासा गरेनन् । यद्यपि, दुवै अहिले पनि एकअर्काको सम्पर्कमा छन् ।
रक्षितले एक अन्तर्वार्तामा भनेका थिए, “हामी कहिलेकाहीँ म्यासेज आदानप्रदान गर्छौं। फिल्म रिलिज हुँदा एकअर्कालाई शुभकामना दिने गर्छौं ।”
रश्मिकाको करियरले हाल नयाँ उचाइ लिएको छ । उनको प्रतिक्षित चलचित्र ‘पुष्पा २ः द रुल’ यस वर्ष डिसेम्बर ५ मा रिलिज हुँदैछ । यस चलचित्रमा उनी श्रीवल्लीको भूमिकामा पुनः देखिनेछिन् । सिनेमामा उनको जोडी अल्लु अर्जुनसँग देखिनेछ, जसले पुष्पा राजको मुख्य भूमिका निभाउँदैछन् ।
रश्मिकाको जीवनको यो पुरानो पाटो सामाजिक सञ्जालमा भाइरल भइरहँदा, उनका फ्यानहरूले उनको जीवन र करियरको यो यात्राबारे चासो देखाइरहेका छन् ।