हरर फ्यामिली ड्रामामा आधारित ‘ममी’को फर्स्टलुक पोस्टरसँगै प्रदर्शन मिति घोषणा
काठमाडौं । हरर फ्यामिली ड्रामा शैलीमा आधारित चलचित्र ‘ममी’को प्रदर्शन मिति घोषणा गरिएको छ । अभिनेत्रीद्धय प्रियंका कार्की र दीया मास्केको मुख्य भूमिका रहेको नेपाली चलचित्रको निर्माण पक्षले मंगलबार फर्स्टलुक पोस्टर सार्वजनिक गर्दै यो सिनेमा आगामी माघ २५ गते प्रदर्शन हुने जानकारी दिइएको हो ।
चलचित्रको पोस्टरमा एउटा ठुलो रुखको फेदमा घर देखाइएको छ भने प्रियंका र दीयालाई सोही रुखको आकारभित्र प्रस्तुत गरिएको छ । पोस्टरमा प्रियंका गम्भीर भावमा देखिन्छिन् भने दीया रगताम्य अनुहारसहित डरलाग्दो अवतारमा प्रस्तुत भएकी छन् ।
चलचित्र ‘ममी’मा एक परिवारले छोरी र कुकुरको दुखद् निधनपछि रहस्यमय कालो बिरालो अपनाएसँगै आउने विपत्तिको कथा प्रस्तुत गरिएको छ ।
समर निरौलाले निर्देशन गरेको चलचित्रमा प्रियंका र दीयासँगै सुलक्षण भारती, समीप निरौला, घनश्याम जोशी, आयुषी ढकाल, जेभिस श्रेष्ठ, गुराँस ढकाल, रिना ढकाल लगायतका कलाकारहरूको अभिनय रहेको छ। निरौलाको डेब्यु निर्देशन रहेको चलचित्रको कथा उनी स्वयमले लेखेका हुन् ।
‘ममी’लाई लोक राज जोशी र पूर्णिमा जोशीले निर्माण गरेका हुन् भने सुमन कोइराला कार्यकारी निर्माता हुन् । निसल पौडेल र शरद महतोले सिनेमाको छायांकन गरेका छन् । चलचित्रको सम्पादन सुरेन महर्जन र कलर दिपेश चौधरीले गरेका हुन् ।
काठमाडौं उपत्यकामा चलचित्रको वितरण काफिया फिल्मस् र मोफसलमा कुवेर सिने डिष्ट्रीव्युसनले गर्ने भएको छ ।