‘पुष्पा–२’ ३–डी भर्सनका लागि टिकट काटेका दर्शकको पैसा कसरी हुन्छ फिर्ता ?
काठमाडौं । ‘पुष्पा–२ : द रुल’ अन्ततः नेपाली दर्शकले ३–डी भर्सन हेर्न पाएनन् । निर्माणपक्षले २–डी भर्सन मात्रै नेपाल पठाएपछि ‘पुष्पा–२ : द रुल’को २–डी मात्रै हेर्न नेपाली दर्शक बाद्य भएका हुन् ।
अग्रिम टिकट बुकिङ गर्ने दर्शकले भने ३–डी भर्सनकै लागि टिकट काटेका थिए । २–डीका लागि भन्दा केही रकम बढी तिर्नुपर्छ ३–डी भर्सन हेर्ने दर्शकले ।
३–डी भर्सन हेर्नका लागि काटेको टिकट के हुन्छ ? हलहरूले ३–डीका लागि भन्दै काटेको पैसा फिर्ता गर्नुपर्नेछ ।
क्यूएफएक्सले उक्त पैसा फिर्ता गर्ने बताएको छ । पैसा फिर्ता लिन हलको प्रवेशद्वारमा आउन क्यूएफएक्सले सूचना नै जारी गरेको छ ।
वान सिनेमाजले बक्सअफिसबाट पैसा फिर्ता गर्ने भन्दै अफिसियल वेबसाइटमा सूचना निकालेको छ ।
यसैबीच ‘पुष्पा–२ : द रुल’ आजबाट प्रदर्शनमा आएको छ । नेपालका अधिकांश हलमा अधिकांश शोमा यो चलचित्र प्रदर्शन हुँदैछ ।
बिहानका अधिकांश शो हाउसफूल भएका छन् । चलचित्र ‘पुष्पा–२ : द रुल’ मा दक्षिण भारतीय अभिनेता अल्लु अर्जुन र अभिनेत्री रश्मिका मन्दना मुख्य भूमिकामा छन् ।
चलचित्रलाई सुकुमार बान्द्रेडीको निर्देशन गरेका छन् । चलचित्रको कथा पनि निर्देशक स्वयंले लेखेका छन् ।