हरर कमेडी ‘फिरफिरे फिरिरी’ ले लियो रिलिज डेट
काठमाडौं । हरर कमेडी जनरामा निर्माण भएको चलचित्र ‘फिरफिरे फिरिरी’ ले रिलिज मिति घोषणा गरेको छ । शनिबार नयाँ पोस्टर सार्वजनिक गर्दै प्रदर्शन मिति घोषणा गरिएको हो । चलचित्र माघ ४ गतेबाट प्रदर्शनमा आउने छ ।
चलचित्रलाई नविन भट्टले निर्देशन गरेका हुन् । उनको यो निर्देशनमा डेब्यु चलचित्र हो ।
यसै चलचित्रबाट सन्दीप श्रेष्ठ र भावना उप्रेतीले नेपाली रजतपटमा डेब्यु गर्दैछन् । चलचित्रमा मनोज कुमार अधिकारी, सन्दिप श्रेष्ठ, भावना उप्रेती, रबिना केसी, पुष्प अवस्थी, सूर्यमान लिम्बु लगायतका कलाकारको अभिनय छ ।
बिन्दबासिनी क्रियसनको ब्यानरमा निर्माण गरिएको चलचित्र मनोजकुमार अधिकारीले निर्माण गरेका हुन् । अधिकारीले यसअघि चलचित्र ‘नौ डाँडा पारी’ र ‘मंगलसुत्र’ निर्माणसँगै अभिनय पनि गरेका थिए । पछिल्लो समय संसारभर हरर कमेडी चलचित्रले दर्शकको साथ पाइरहेको बेला नेपाली हरर कमेडी चलचित्रको निर्माण गरेको बताएका छन् ।
चलचित्रमा यसमा नितिश पुन सह–निर्माता छन् । लेखन सन्दिप श्रेष्ठ र नबिन भट्टको छ । चलचित्रमा जितु तामाङको छायांकन, रोशन दास, प्रकाश दाहाल र अग्नि सुबेदीको सहायक निर्देशन, केशव राज भट्टको कोरियोग्राफी, एलिस कार्कीको ब्याकराउण्ड म्युजिक, प्रशान्त सिवाकोटीको संगीत, अमित श्रेष्ठको साउण्ड डिजाइन, अनन्त घिमिरेको सम्पादन तथा कलर संयोजन रहेको छ ।
‘फिरफिरे फिरिरी’ लाई देशभर आरआर फिल्म्सले वितरण गर्नेछ। डिजिटल अधिकार म्युजिक नेपालले लिएको छ ।