‘फिरफिरे फिरिरी’को ‘अलमल जिन्दगी’
काठमाडौं । माघ ४ गतेबाट प्रदर्शनमा आउने हरर कमेडी चलचित्र ‘फिरफिरे फिरिरी’को नयाँ गीत सार्वजनिक गरिएको छ ।
स्याड भर्सनको ‘अलमल जिन्दगी’ बोलको गीतमा प्रशान्त शिवाकोटीको स्वर, शब्द तथा संगीत रहेको छ । चलचित्रको गीतमा रिजोल पोखरेलको संगीत संयोजन रहेको छ । प्रशान्त शिवाकोटीको स्वर संगीतमा रहेको ‘पूर्ण बहादुरको सारंगी’ का गीतहरुले दर्शक श्रोताको मन जित्न सफल बन्यो ।
यस चलचित्रलाई नविन भट्टले निर्देशन गरेका हुन् । उनको यो डेब्यु निर्देशकीय सिनेमा हो ।
चलचित्रमा मनोज कुमार अधिकारी, सन्दिप श्रेष्ठ, भावना उप्रेती, रबिना केसी, पुष्प अवस्थी, सूर्यमान लिम्बु लगायतका कलाकारको अभिनय रहेको छ । यसै सिनेमाबाट सन्दीपर भावनाले नेपाली रजतपटमा डेब्यु गर्दैछन् ।
बिन्दबासिनी क्रियसनको ब्यानरमा निर्माण गरिएको चलचित्रलाई मनोजकुमार अधिकारीले निर्माण गरेका हुन् । अधिकारीले यस अघि ‘नौ डाँडा पारी’ र ‘मंगलसुत्र’ चलचित्र निर्माणसँगै अभिनय पनि गरेका थिए ।
पछिल्लो समय संसारभर हरर कमेडी सिनेमाले राम्रो दर्शकको साथ पाई रहेको बेला अधिकारीले नेपाली हरर कमेडी चलचित्र ‘फिरफिरे फिरिरी’को निर्माण गरेका हुन् ।
चलचित्रको सह-निर्माता नितिश पुन रहेका छन् । सन्दिप श्रेष्ठ र नबिन भट्टको लेखन रहेको सिनेमामा जितु तामाङको छायांकन, रोशन दास, प्रकाश दाहाल र अग्नि सुबेदीको सहायक निर्देशन, केशव राज भट्टको कोरियोग्राफी, एलिस कार्कीको ब्याकराउण्ड म्युजिक, प्रशान्त सिवाकोटीको संगीत, अमित श्रेष्ठको साउण्ड डिजाइन, अनन्त घिमिरेको सम्पादन तथा कलर संयोजन रहेको छ ।
चलचित्रलाई देशभर आरआर फिल्म्सले वितरण गर्नेछ ।