‘पिताम्बर’को पोस्टरमा एक्सन, चैत २९ मा रिलिज हुँदै
काठमाडौं । चलचित्र ‘पिताम्बर’ले पोस्टर सार्वजनिक गर्दै रिलिज डेट तय गरेको छ । कृषा चौलागाईं निर्देशित सिनेमा ‘पिताम्बर’ चैत २९ गते रिलिज हुनेछ ।
‘पिताम्बर’को पोस्टरमा एक्सन देखिएको छ । पोस्टरमा प्रदीप खड्का, सौगात मल्ल र दयाहाङ राईले स्थान पाएका छन् । प्रदीपको मुहार रगले पोतिएको छ । सौगात बन्दुक चलाइरहेका छन् भने दयाहाङको अनुहारमा रिस देखिन्छ ।
‘पिताम्बर’ स्टार कलाकारहरूको बलियो लाइनअप छ । तर पोस्टरमा अन्य कलाकार अटाएका छैनन् ।
चलचित्रमा सौगात, प्रदीप र दयाहाङसँगै अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारीलगायत कलाकारको अभिनय रहनेछ ।
केपी फिल्मसले पुरुषोत्तम प्रधान फिल्मससँग सहकार्य गरेको पिताम्बरलाई पुरुषोत्तम प्रधानले खिचेका छन् । सिनेमाको निर्मातामा विशाल चौलागाईं छन् ।
प्रदीप भारद्धाजको लेखन रहेको चलचित्रमा ५ करोड बजेट लाग्ने निर्माणपक्षले जनाएको छ ।