‘होस्टेल ३’ को पोस्टरसँगै नयाँ प्रदर्शन मिति सार्वजनिक
काठमाडौं । चलचित्र ‘होस्टेल ३’ को पोस्टरसँगै आगामी फागुन २३ गतेको लागि नयाँ प्रदर्शन मिति सार्वजनिक गरिएको छ ।
निर्देशक सशान कँडेलले निर्देशन गरेको चलचित्रको सार्वजनिक पोस्टरमा पात्रहरूको हास्यजन्य शैलीले चलचित्रको कथावस्तु रमाइलो र जीवन्त हुने सङ्केत गरेको छ ।
चार मुख्य पात्रहरूलाई बास्केटबल कोर्टमा रमाइला गतिविधिहरू गरिरहेको देखिन्छ । जसमा आशिष घिमिरे, पारस बम (कुलब्वाई), रिहान गिरि, र पदम तामाङ रहेका छन् ।
सफल शृङ्खला ‘होस्टेल’ को दुई शृंखलाबाट उदाएका कलाकारहरू अहिले चलचित्र क्षेत्रमा स्थापित छन् । ‘होस्टेल’ बाट अनमोल केसी, सलोन बस्नेत, प्रकृति श्रेष्ठ लगायतका कलाकारहरूले डेब्यु गरेका थिए । त्यस्तै, ‘होस्टेल रिटर्न्स’ बाट स्वस्तिमा खड्का, सुशील श्रेष्ठ, नाजिर हुसेन, सुशील सिटौला लगायतका कलाकारहरूले डेब्यु गरेका थिए ।
‘होस्टेल ३’ ले क्याम्पस जीवनका सङ्घर्ष, मित्रता, र रमाइलो क्षणहरूको कथा समेट्ने अपेक्षा गरिएको छ ।
निर्देशन कँडेलकै कथा रहेको चलचित्रको स्क्रिप्ट माधव शर्माले लेखेका छन् ।
सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको चलचित्रमा पारस, रिहान, आशिष, पदमसहित सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुषलगायतका कलाकारहरूको अभिनय रहेको छ ।
सिनेमाका निर्माताहरू कर्ण कार्की र गोविन्द अधिकारी, सह-निर्माता सुरेश कँडेल तथा कार्यकारी निर्माता शङ्कर कोइराला हुन् ।
चलचित्रमा अर्जुन तिवारी डिओपी, बुद्ध थापा र मनोज खत्री सिनेमाटोग्राफर, हिमाल केसी द्वन्द्व निर्देशन रहेका छन् । यो सिनेमाका नेपाल वितरक आरआर फिल्म्स र काफिया फिल्म्स हुन् ।
