अस्मिता अधिकारी र महेश काफ्लेले गरे इन्गेजमेन्ट
चर्चित गायिका अस्मिता अधिकारी र गायक महेश काफ्लेले इन्गेजमेन्ट गरेका छन् । लामो समयदेखि प्रेम सम्बन्धमा उनीहरुले संयुक्त अरब इमिरेट्समा रहेको संसारकै सबैभन्दा अग्लो भवन बुर्ज खलिफाअगाडि औँठी साटेका हुन् ।
गायिका अधिकारी र गायक काफ्लेले एकअर्काबीच औंठी साटेको तस्विर सामाजिक सञ्जाल फेसबुक पोस्ट गर्दै आफूहरू दुईबाट एक भएको बताएका छन्।
गायिका अधिकारीले ‘दुई आत्मा, एउटै मुटु। सधैँभरी सँगै। हामी इन्गेज्ड भयौँ।’ भनेर लेख्दा गायक काफ्लेले ‘सहयात्राको यो सुरुवात’ भन्दै तस्बिरहरू सेयर गरेका छन्।
लामो समयदेखि प्रेम सम्बन्ध रहेरको चर्चा चलेको पनि दुवैले यसलाई अस्वीकार गर्दै आएका थिए। उनीहरुले आफूहरू मिल्ने साथीमात्र भएको बताएका थिए।
अस्मिताका ‘तिम्रो मायाले बाँधेर राख’, ‘काले केटाले’, ‘टाढा भएपनि’, ‘मेसो मिलाएर’, ‘फूलैफूल दिन्छौ कि’, ‘को होला त्यो’ लगायतका गीतहरू चर्चित छन्।
उता गायक काफ्लेले गाएका ‘नाच फिरीरी’, ‘माया बिरानी’, ‘चाइना जापान’, ‘लजावती झार’, ‘तातो गोली’ लगायतका गीतहरू दर्शकमाझ लोकप्रिय छन्।
अधिकारी भने नेपाल आइडलसँगै उदाएकी गायिका हुन् । गायक तथा संगीतकार काफ्ले पूर्वपत्रकार पनि हुन् । उनी खेलकुद पत्रकारको रुपमा लामै समय काम गरेका थिए ।
