बक्स अफिस कलेक्शन: ‘कल्की’ले तीन दिनमै बनायो दोहोरो शतक, अन्य फिल्मले गरे यति कमाइ
यही शुक्रबारदेखि प्रदर्शनमा आएको साउथ सुपरस्टार प्रभास अभिनीत फिल्म ‘कल्की: २८९८ एडी’ उत्साहका साथ हलमा प्रदर्शन भइरहेको छ ।
बक्सअफिसमा जबर्जस्त सुरुवात गरेको ‘कल्की’ ले पहिलो दिनको राम्रो कमाईपछि दोस्रो दिन कमाइमा केही सुस्त गति देखिएको थियो । तर, शनिबार फिल्मको कलेक्सनमा सुधार आएको छ । यससँगै चन्दु च्याम्पियन र मुन्जा पनि टिकट विन्डोमा टिक्न सक्दो प्रयास गरिरहेका छन् । शनिबार कुन फिल्मले कस्तो प्रदर्शन गर्यो थाहा पाउनुहोस्।
कल्की
‘कल्की: २८९८ एडी’मा प्रभाससँगै अमिताभ बच्चन, कमल हासन, दीपिका पादुकोण र दिशा पटानी मुख्य भूमिकामा छन्। फिल्मलाई नाग अश्विनले निर्देशन गरेका हुन् । टिकट विन्डोमा फिल्मको प्रदर्शन अहिलेसम्म सन्तोषजनक रहेको छ । पहिलो दिन फिल्मले सबै भाषाबाट ९५.३ करोड कमाएको थियो ।
योसँगै दोस्रो दिन फिल्मको कमाईमा झण्डै ४० प्रतिशतले गिरावट आएको छ । फिल्मले शुक्रबार ५७.६ करोड कमाएको थियो । पछिल्लो तथ्यांक अनुसार फिल्मले तेस्रो दिन ६७.१ करोडको कलेक्सन गरेको छ । योसँगै फिल्मको कुल कमाई २२० करोड पुगेको छ ।
‘कल्की’ ले चार दिनमा हिन्दी भर्सनको व्यापार एक सय करोड नाघ्ने प्रक्षेपण गरिएको छ ।
६ सय करोडको लागतमा बनेको ‘कल्की’ले समीक्षा पनि राम्रो पाएको छ । विशेषगरी क्लाइमेक्सको प्रशंसा भइरहेको छ भने अभिनेता अमिताभ बच्चनको भूमिका (अश्वत्था) र अभिनय सर्वाधिक रुचाइएको छ । हिन्दू महाकाव्य र विज्ञानमा आधारित भएर फिल्म बनेको हो ।
चन्दु च्याम्पियन
बलिउड अभिनेता कार्तिक आर्यन अभिनित फिल्म ‘चन्दु च्याम्पियन’ले मानिसको मनमा स्थान बनाउन सफल भएपनि बक्स अफिसमा सो फिल्मले अपेक्षित व्यापार गर्न सकेको छैन । फिल्मले १६औं दिनमा ९५ लाख रुपैयाँ कमाएको थियो । योसँगै फिल्मको कुल कमाई ५७.२ करोड पुगेको छ ।
मुन्जा
हरर फिल्म मुन्जाले हालसम्म हलमा राम्रो प्रदर्शन गरेको छ । यो फिल्म बक्स अफिसमा हिट साबित भएको छ । शर्वरी वाघ र अभय वर्मा अभिनित फिल्मको कथाले दर्शकलाई तान्न सफल भएको छ । फिल्मले १६ औं दिनमा १ करोड २४ लाखको कलेक्सन गरेको छ । फिल्मको कुल कमाई अहिले ९२.८९ करोड पुगेको छ ।