स्वस्तिमा र निश्चलको फिल्म ‘बेहुली फ्रम मेघौली’को गीतमा दीपाश्री, बेनिशादेखि प्रदीपसम्म
चलचित्र ‘बेहुली फ्रम मेघौली’को पहिलो गीत सार्वजनिक गरिएको छ । सिनेमाको थिम गीतको रुपमा सार्वजनिक गरिएको यो प्रमोसनल गीतसँगै प्रदर्शन मिति पनि घोषणा गरिएको हो।
शुक्रबार सार्वजनिक चलचित्रको ‘बिहे गर्ने कि नगर्ने ?’ बोलको गीतसँगै चलचित्र असोज १७ गते अर्थात् घटस्थापनाको दिनबाट प्रदर्शनमा आउने जानकारी गराइएको छ ।
यो गीतमा अविवाहितहरुलाई समाजले गर्ने प्रश्नलाई समेटिएको छ । रोहित शाक्यको संगीत रहेको गीतमा कुशल पोखरेलको शब्द, रचना छ ।
विवाहको कथा भन्ने यो सिनेमाको प्रमोसनल गीतको भिडियोमा नेपाली फिल्म क्षेत्रमा नाम चलेका र अधिकांश अविवाहित रहेकै कलाकारहरूले अभिनय गरेका छन् ।
जसमा अभिनेता प्रदीप खड्का, नाजिर हुसेन, धिरज मगर तथा अभिनेत्री साम्राज्ञी राज्यलक्ष्मी शाह, बेनिशा हमाल, शिल्पा मास्केका अलवा निर्देशक दीपाश्री निरौला फिचर्ड छन् । उनीहरुका अलवा सिनेमाको सार्वजनिक गीतमा मुख्य कलाकारहरु निश्चल बस्नेत, स्वस्तिमा खड्का, विजय बराल, लोकेन्द्र लेखकलाई पनि देख्न सकिन्छ ।
स्वस्तिमा खड्काको कन्सेप्ट रहेको यो भिडियोलाई निश्चल बस्नेतले निर्देशन गरेका हुन् ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको सिनेमामा साजन काफ्ले र आकाश बरालको लेखन तथा निर्देशन रहेको छ । यो उनीहरुको डेव्यु निर्देशकिय सिनेमा हो ।
स्वस्तिमा खड्का र निश्चल बस्नेतको निर्माण रहेको सिनेमाको कार्यकारी निर्मातामा शंकर पाण्डे र फिरोज खड्का छन् । स्वस्तिमाले पहिलोपटक फिल्म निर्माणको अनुभव लिएकी हुन् । नरेन्द्र मैनालीको छायांकन, प्रदीप लामा र केवीका खत्रीको कोरियोग्राफी तथा जयन जे वाइवा र कुशल पोखरेलको संगीत रहेको छ ।