चलचित्र ‘माइली’मा करिष्मा अनुबन्धित
२३ असार २०८१, शनिबार
काठमाडौं । निर्माणको चरणमा रहेको चलचित्र ‘माइली’ मा अभिनेत्री करिष्मा मानन्धर अनुबन्धित भएकी छन् ।
बाबुसाहेब बलामीको निर्देशन रहने चलचित्रमा करिष्मालाई अनुबन्धित गरिएको निर्माणपक्षले जनाएको छ । करिष्माको पोस्टरलुक पनि सार्वजनिक गरिएको छ ।
निर्देशक बलामीले सत्यघटनामा आधारित चलचित्रमा महिलाको पीडा देखाइने बताएका छन् । श्रीमान् नहुँदा सन्तान हुर्काउन महिलाले गर्ने संघर्ष चलचित्रले समेट्नेछ ।
असारको अन्तिमबाट छायांकन सुरु हुनेछ । चलचित्रको सुटिङ मकवानपुरको वीरखर्ग, कुलेखानी, काठमाडौं र दुबईमा हुने निर्माणपक्षले जनाएको छ ।
चलचित्रमा शंकर अधिकारी ‘घायल’को गीत र पटकथा, सम्बाद तथा राजेन्द्र बजगाइँको संगीत रहनेछ ।