आइएमडिबीले सार्वजनिक गर्यो वर्ष २०२५ का १० सबैभन्दा प्रतिक्षित भारतीय चलचित्रहरूको सूची

काठमाडौं । विश्व प्रसिद्ध फिल्म डेटाबेस प्लेटफर्म आइएमडिबी (IMDb) ले वर्ष २०२५ का लागि भारतीय सिनेमा क्षेत्रका १० सबैभन्दा प्रतिक्षित चलचित्रहरूको सूची सार्वजनिक गरेको छ । सार्वजनिक सूचीमा हिन्दी भाषाका ७ वटा र तेलुगु, तमिल, मलयालम भाषाका एक–एक चलचित्र परेका छन् । बहुभाषिक प्रस्तुतिमा आउने यी चलचित्रहरूमा उत्कृष्ट कलाकारहरूको जमघट देखिएको छ ।
यी चलचित्रहरूको सूचीले आगामी वर्ष भारतीय सिनेमाको विविधता, स्टार पावर र भव्य प्रस्तुतिको संकेत गर्दछ । अब हेर्न बाँकी छ, कुन सिनेमाले दर्शकको दिल जित्छ र बक्स अफिसमा झण्डा गाड्छ ।
यहाँ प्रस्तुत छ आइएमडिबीको सूचीअनुसार २०२५ का सबैभन्दा प्रतिक्षित भारतीय चलचित्रहरू:
१. कुली (तमिल)
निर्देशक लोकेश कनागराजको निर्देशनमा तयार भएको सुपरस्टार रजनीकान्त अभिनीत एक्शन ड्रामा ‘कुली’ आगामी अगस्ट १४, २०२५ मा तमिलसहित तेलुगु, हिन्दी, मलयालम र कन्नड भाषामा रिलिज हुने तय भएको छ। यस फिल्ममा नागार्जुन, श्रुति हासन, र आमिर खान (क्यामियो भूमिकामा) पनि देखिनेछन् । चलचित्रलाई सन पिक्चर्सले निर्माण गरेको हो ।
२. वारः २ (हिन्दी)
सुपरस्टार ऋतिक रोशन, जुनियर एनटीआर र कियारा आडवाणी अभिनीत यो स्पाई एक्शन थ्रिलर अयान मुखर्जीले निर्देशन गरेका हुन् भने निर्माण यशराज फिल्म्स अन्तर्गत आदित्य चोपड़ाले गरेका हुन् । अगस्ट १४, २०२५ मा हिन्दी, तेलुगु र तमिल भाषामा फिल्म रिलिज हुनेछ ।
३. राजासाहेब (तेलुगु)
प्रभास, सञ्जय दत्त, मालविका मोहनन र निधि अग्रवाल अभिनीत यो हरर कमेडी फिल्म मारुतिद्वारा निर्देशित हो । डिसेम्बर ५, २०२५ मा यो चलचित्र तेलुगु, हिन्दी, तमिल, मलयालम र कन्नड भाषामा पर्दामा आउँदैछ ।
४. आँखा कि गुस्ताखियाँ (हिन्दी)
विक्रान्त मेसी र शनाया कपूरको मुख्य भूमिका रहेको यो रोमान्टिक ड्रामा चलचित्र सन्तोष सिंहको निर्देशनमा बनेको हो । फिल्म जुलाई १८, २०२५ मा रिलिज हुनेछ ।
५. सैयारा (हिन्दी)
यशराज फिल्म्सको प्रस्तुतिमा बनेको ‘सैयारा’ फिल्मले आहान पाण्डेलाई बलिउडमा डेब्यू गराउँदैछ। अनित पद्डासँगको जोडीमा उनी देखिने यो फिल्म मोहित सुरीले निर्देशन गरेका हुन् । चलचित्र जुलाई १८, २०२५ मा विश्वभर रिलिज हुनेछ ।
६. बागीः ४ (हिन्दी)
लोकप्रिय एक्शन थ्रिलर फ्रेन्चाइजको चौथो भाग ‘बागीः ४’ मा टाइगर श्राफले पुनः मुख्य भूमिका निभाएका छन्। साथमा सञ्जय दत्त, हरनाज कौर सन्धु र सोनम बाजवा पनि छन् । अहमद खानद्वारा निर्देशित यो चलचित्र सेप्टेम्बर ५, २०२५ मा रिलिज हुनेछ ।
७. सन अफ सरदारः २ (हिन्दी)
अजय देवगन र मृणाल ठाकुर अभिनीत यो रोमान्टिक कमेडी–एक्शन चलचित्र सन् २०१२ मा रिलिज भएको ‘सन अफ सरदार’ को सिक्वेल हो । विजय कुमार अरोरा निर्देशित फिल्म जुलाई २५, २०२५ मा पर्दामा आउनेछ ।
८. हृदयपुर्वम (मलयालम)
मोहनलाल, मालविका मोहनन र संगीत प्रताप अभिनीत यो पारिवारिक फिल्मलाई सत्यन एन्थिकडले निर्देशन गरेका छन् । अगस्ट २८, २०२५ मा मलयालम भाषामा रिलिज हुने यो फिल्म वर्षको दोस्रो सबैभन्दा प्रतिक्षित मलयालम चलचित्र मानिएको छ ।
९. महावतार नरसिम्हा (हिन्दी)
होम्बले फिल्म्स र क्लीम प्रोडक्सनको सहकार्यमा बनेको यो एनिमेटेड फिल्म भगवान विष्णुका अवतारहरूमा आधारित कथालाई प्रस्तुत गर्दछ । अश्विनकुमार निर्देशित फिल्म जुलाई २५, २०२५ मा हिन्दी, कन्नड, तेलुगु, तमिल, मलयालम भाषामा र थ्रीडी संस्करणमा रिलिज हुनेछ ।
१०. अल्फा (हिन्दी)
आलिया भट्ट र शर्वरी वाघ अभिनीत यो महिला–केन्द्रित स्पाई थ्रिलर यशराज फिल्म्सको सातौं स्पाइ युनिभर्स फिल्म हो । शिव रवैलद्वारा निर्देशित यो चलचित्र डिसेम्बर २५, २०२५ मा रिलिज हुने तय गरिएको छ ।