एउटा सुपरहिट फिल्म खेलेर हिरोइन गायब !
काठमाडौं । चलचित्रमा भित्रिँदा उनको खुब चर्चा भयो । चर्चा सुन्दा लाग्थ्यो, अबको नेपाली चलचित्र उद्योगमा हिरोइनमा उनको एकछत्र राज चल्नेछ । र, भइरहेका नायिका सबै ओझेलमा पर्नेछन् ।
चलचित्रले नेपालमा मात्र होइन, नेपाली डायस्पोरामा पनि उनलाई चिनायो । चलचित्र बक्सअफिसमा सुपरहिट पनि भयो । तर, चलचित्रकी ती नायिका भने एउटा फिल्म खेलेर एकाएक गायब भइन् । न, उनका अरु चलचित्र आए न आउने पाइपलाइनमा नै छन् ।
फिल्म हो, ‘प्रेम गीत ३’ जो नेपालमा मात्रै होइन, भारतमा पनि हिन्दी भाषामा पनि लाग्यो । अनि यहाँ चर्चा गएकी नायिका हुन्, क्रिष्टिना गुरूङ ।
अभिनेता प्रदीप खड्काको जोडी बनेर चलचित्र क्षेत्रमा भित्रिँदा क्रिष्टिनाले निकै चर्चा थियो । अमेरिकादेखि नेपाल आएर क्रिष्टिनाले यो फिल्ममा काम गरेकी थिइन् । चलचित्र भारतसहित विश्वमा धेरै देशका रिलिज भएकाले क्रिष्टिनाले नेपाली डायस्पोरामा पनि चर्चा पाइन् । तर, लोभलाग्दो चर्चा पाएकी क्रिष्टिना उक्त फिल्म रिलिजपछि एकाएक गायब बनिन् ।
चलचित्र विसं २०७९ को दसैंमा रिलिज भएको थियो । अहिले उक्त चलचित्र रिलिज भएको तीन वर्ष पुग्न लागेको छ । तर, किरब तीन वर्षसम्म उनी आखिर किन गायब भइन् ? यतिबेला फिल्मकर्मी, सञ्चारकर्मी एवं दर्शकमा समेत यसमा चासो छ ।
‘प्रेम गीत ३’ रिलिजपछि उनलाई थुप्रै चलचित्रबाट अफर आएको बताइएको हल्ला थियो । तर, न उनले कुनै फिल्म साइन गरेको खबर बाहिरियो ? न त क्रिष्टिना मिडियामा नै देखा परिन् ।
उनलाई अफर आएका चलचित्रको स्क्रिप्ट चित्त नबुझेको हो कि क्रिष्टिनाले फिल्म क्षेत्र नै छाड्ने निर्णय लिएकी हुन् ? यसबारे उनले केही नबोल्दा पनि क्रिष्टिनाको यो गुमनामलाई लिएर विभिन्न जिज्ञासा उब्जिएका छन् ।