‘गोपी’ टिमको नयाँ प्रस्तुति : घोषणा भयो ‘मुनामदनको ब्रेकअप’
काठमाडौं । पत्रकारिताबाट चलचित्र क्षेत्रमा यात्रा तय गरेका तीन सर्जक निर्देशक दीपेन्द्र लामा, लेखक सामीप्यराज तिमल्सेना र फोटोपत्रकार श्रीधर पौडेलले फेरि एकपटक सहकार्य गर्ने भएका छन् ।
सन् २०७५ मा रिलिज भएको चलचित्र ‘गोपी’मा सहकार्य गरेका यी तीनले आइतवार नयाँ सिनेमा घोषणा गरेका छन् ।
यो टिमले नयाँ चलचित्र ‘मुनामदनको ब्रेकअप’को घोषणा गर्दै अभिनेता राज कटवाललाई अनुबन्धित गराएका छन् । कटवालले हालैको चलचित्र ‘नरसिंहा अवतार’मा अभिनय गरेका थिए ।
निर्देशक लामाका अनुसार अन्य कलाकारहरूको चयन प्रक्रिया जारी छ । “कथामा उपयुक्त हुने कलाकार छान्ने तयारीमा छौं । राज कटवाल पात्रका लागि उपयुक्त लागेपछि अनुबन्धित गरेका हौं,” उनले बताए ।
निर्देशक लामाले ‘घामपानी’ बाट सुरुवात गरेका थिए र उनले ‘दुखी आत्मा’ सहित ६ वटा चलचित्र निर्देशन गरिसकेका छन् । चलचित्र ‘मुनामदनको ब्रेकअप’लाई उनले एक “मनोरञ्जक तर गम्भीर स्वादको प्रेमकथा” बनाउने योजना बनाएका छन् ।
लेखक सामीप्यराज तिमल्सेनाका अनुसार ‘मुनामदनको ब्रेकअप’मा ग्रामीण परिवेशको प्रेमकथा हुनेछ, जुन हालसम्म नेपाली सिनेमामा कमै देखिएको शैलीमा प्रस्तुत गरिनेछ ।
“हामी भिन्न स्वादका प्रेमकथा खोजिरहेका दर्शकलाई लक्षित गरेर कथा तयार पार्दैछौं। अहिले दर्शक हलसम्म ल्याउनु चुनौतीपूर्ण भएकाले पटकथामा गहिरो मेहनत हुनेछ,” तिमल्सेनाले स्पष्ट पारे ।
यस चलचित्रका कार्यकारी निर्माता रहेका पौडेलले ‘मुनामदनको ब्रेकअप’को छायांकन कास्कीको ग्रामीण भेगमा हुने जानकारी दिए ।
“पटकथा र प्रिप्रोडक्शन जबसम्म पर्फेक्ट हुँदैन, हामी क्यामेरा रोल गर्दैनौं । हामी गुणस्तरीय प्रोडक्ट दिन तयार छौं र त्यसका लागि समय लगाउने सोचमा छौं,” पौडेलले उल्लेख गरे ।
अभिनेता कटवालले आफू ‘मुनामदनको ब्रेकअप’मा काम गर्न पाउँदा अत्यन्त उत्साहित रहेको प्रतिक्रिया दिएका छन् ।
“यस फिल्ममा मैले आफूलाई अझ निखार्दै काम गरिरहेको छु । भूमिका चुनौतीपूर्ण छ तर त्यही चुनौतीले प्रेरणा दिएको छ,” उनले भने ।