‘माग्ने राजा’बारे के भन्छिन् वर्षा ?
काठमाडौं । नायिका वर्षा शिवाकोटीले चलचित्र ‘माग्ने राजा’मा आफ्नो फरक खालको भूमिका रहेको बताएकीछन् । वर्षाको मुख्य भूमिका रहेको चलचित्र ‘माग्ने राजा’ भदौ ६ गते रिलिज हुँदैछ । यो चलचित्रमा उनी केदार घिमिरे ‘माग्ने बुढा’को जोडीका रूपमा दर्शकमाझ देखिँदैछिन् ।
“मलाई सिनेमामा प्रस्ताव आउनासाथ मैले काम गर्न सहमत जनाएँ । किनकी राम्रो टिमको लोभ थियो । केदार दाइसँग मैले ‘छक्का पन्जा ५’मा सहकार्य गरिसकेकाले पनि म माग्ने राजामा काम गर्न राजी भएँ,’ वर्षा भन्छिन्, “पहिलोपटक केदार ‘माग्ने राजा’मा प्रमुख भूमिकामा रहँदा उहाँको अपोजिटमा रहँदा म उत्साहित छु ।”
उनले निर्देशक ऋषि लामिछाने पनि लामो समयपछि निर्देशनमा कमव्याक गरेको र लेखक सामिप्यराज तिमल्सेनाको स्क्रिप्टमा आफूले यसअघि नै सिनेमामा काम गरिसकेकाले सिनेमामा केही पक्कै फरक हुने अपेक्षासहित सहकार्य गरेको बताइन् ।
सधैँ गरिरहेको क्यारेक्टर भन्दा ‘माग्ने राजा’मा आफू फरक देखिएको वर्षाको दाबी छ । “सिनेमाको कथावस्तु नै फरक छ । मेरो जुन क्यारेक्टर भन्नुभएको छ, त्यसमा उहाँहरुले न्यारेट गर्दाखेरी त्यस्तो देखिन्छु या देखिन्नँ भन्ने थियो,” वर्षा भन्छिन्, “तर उहाँहरुको सोचाई अनुसार नै मैले काम गरेकी छु ।”
वर्षाले निर्माण पक्षको योजना अनुसार नै सिनेमा बनेकाले सिनेमा सफल हुनेमा आफू ढुक्क रहेको बताइन् ।
“निर्माता र निर्देशकको योजनाअनुसार नै काम भएको छ । टिम र स्क्रिप्ट राम्रो भएर पनि हुँदैन, त्यसलाई बजारमा कसरी प्रस्तुत गर्ने भन्ने पनि हुन्छ,” उनले भनिन्, “हामी यति लामो समयदेखि व्यवासायिक रुपमा काम गरिरहेको हिसाब पनि सोच्नुपर्ने भयो । उहाँहरुको काम गराई देखेपछि काम गर्न पनि सजिलो भयो ।”
सिनेमाको कन्टेन्टमा दर्शकले रिलेट गर्नसक्ने वर्षाको भनाइ छ । “चलचित्रले अहिलेको वर्तमान अवस्थालाई चित्रण गरेको छ । हाम्रो समाजले निम्न, उपल्लो वर्ग भनेर सिकाएको छ । सिनेमाले सबै वर्गलाई प्रतिनिधित्व गर्छ,” उनी भन्छिन्, “अहिलेको राजनीतिक अवस्थालाई पनि यसले केही चित्रण गरको छ । सिनेमाले राजनीति, साथी, परिवार र प्रेमिकाको कुरालाई बलियो गरी प्रस्तुत गरेको छ ।”
‘माग्ने राजा’मा ‘छक्का पञ्जा–५’मा भन्दा मैले केही फरक गरेको छु जस्तो लाग्छ,” उनी भन्छिन् ।
उनले सुरुमा सिनेमाको नाम सुन्दा रोचक लागेको बताइन् । माग्ने भन्नासाथ दिमागमा धेरै कुरा आउने भएकाले ती आएका कुरालाई एउटै चरित्रले बोक्ने उनको दाबी छ । दर्शकले चलचित्र मन पराउनेमा उनी ढुक्क छिन् ।