‘असफल’ निर्देशक, लेखक, निर्माता र हिरोको गठजोडबाट कस्तो सिनेमा आउला ?
काठमाडौं । केही समय यता निर्देशक दीपेन्द्र लामाका राम्रा दिन चलिरहेका छैनन् । ठूलो आशा र स्टारकास्टसहित आएको चलचित्र ‘दुखी आत्मा’ले आशातित रिजल्ट दिएन । रिलिजअगाडि नै आलोचित बनेका उनले चलचित्र रिलिजपछि पनि सुखद अनुभूति गर्न पाएनन् ।
अब उनले ‘मुनामदनको ब्रेकअप’ निर्देशन गर्ने भएका छन् । यो सिनेमाले टाइटल अनुसार आधुनिक समयमा मुनामदनको कसरी प्रेम टुटिरहेको छ भन्ने देखाउनेछ ।
छलछाम र कमजोर जगमा हिँड्ने र टुट्ने डिजिटल युगको प्रेमको कथा लेख्न लागेका स्क्रिप्ट राइटर सामीप्यराज तिमलसेनाका पनि राम्रा दिन चलेका छैनन् । उनले लेखेको ‘माग्ने राजा’ले टिजर आएपछि उनले राम्रोभन्दा पनि नकारात्मक कमेन्ट पाइरहेका छन् । टिजरले राम्रो संकेत नदिएको भन्दै आलोचना भइरहेको छ ।
भलै यो हतारमा आएको प्रतिक्रिया हो । कहिलेकाहीँ टिजर र ट्रेलर राम्रो भएर पनि सिनेमा राम्रो हुँदैन । कहिलेकाहीँ टिजर र ट्रेलर ठिकठाक भए पनि चलचित्र राम्रो हुन्छन् । त्यसैले यसमा सिनेमा कुर्ने धैर्यता देखाऔँ ।
तर, सामीप्यले लेखेको ‘गोपी’ले पनि मजाले गाली खाएको थियो । गालीको वर्षा लागे पनि र हलमा सिनेमा नचले पनि राष्ट्रिय अवार्ड भने यो चलचित्रले पायो । कारण त्यो वर्ष राम्रा सिनेमा रिलिज नभएको अरु होइन निर्देशक दीपेन्द्र लामा र सामीप्य आफैँले पनि आफ्नो सर्कलमा बताउने गरेका थिए ।
सामीप्यले लेखेको सिनेमा ‘नाईं नभन्नु ल ६’ र ‘हजार जुनीसम्म’ पनि निकै कमजोर भएका थिए । बक्सअफिस र समीक्षा दुवैमा यी चलचित्र रुचाइएको थिएन ।
राज कटुवालको सिनेमा ‘नरसिंहा : अवतार’ केही समयअगाडि रिलिज भयो । तर, यो चलचित्रले पनि उनलाई धेरै माथि उठाउन सकेन । यो चलचित्रमा चर्चा थियो त केबल राजेश हमालको ।
राजेशसँगसँगै उत्तिकै स्क्रिन टाइम पाए पनि न उनेका अभिनयको त्यति तारिफ भयो । न त चर्चा नै । उनी राजेश हमालको छायामा परे ।
बाँकी रहे ‘मुनामदनको ब्रेकअप’का कार्यकारी निर्माता श्रीधर पौडेल । सिनेमा निर्माणमा रहर गरे पनि फापेको छैन अहिलेसम्म उनलाई । उनको पछिल्लो चलचित्र ‘बहाव’ सफल भएको थिएन । सुरक्षा पन्तलाई मुख्य भूमिकामा लिएर उनले यो चलचित्र बनाएका थिए । तर, बक्सअफिसमा यो चलचित्र पूरै असफल भएको थियो ।
त्यसअघि उनी कार्यकारी निर्माता रहेको पहिलो चलचित्र ‘गोपी’ले पनि बक्सअफिस र समीक्षा दुवैमा आफूलाई राम्रो स्थानमा उभ्याउन सकेको थिएन ।
राजलाई छोड्ने हो भो यी निर्देशक, लेखक र निर्माताबीच पुनः सहकार्य हुन लागेको हो । लगातार असफल प्रायः यी तीन र बक्सअफिस र समीक्षा दुवैमा कमजोर देखिएको ‘नरसिंहा : अवतार’का हिरोबीचको यो गठजोडबाट कस्तो सिनेमा आउला भन्ने कौतुहलताको विषय हो ।
तर, विगतका कमजोरी पहिचान गरेर त्यसबाट आफूलाई बचाउँदै राम्रो चलचित्र दिन सफल पो हुने हुन् कि ? यो सम्भावना पनि उत्तिकै छ । यो गठजोडलाई हाम्रो शुभकामना पुरानो छवि पखालेर सफल निर्देशक, लेखक, निर्माता र कलाकार बन्न सक्नुहोस् । यहाँहरूबाट दर्शकले एउटा राम्रो चलचित्र हेर्न पाउन् । हामीले पनि राम्रो सिनेमा बनेको समाचार लेख्न पाउँ ।