वर्षाको ठाउँमा केकी
काठमाडौं । लक्ष्मण रिजालको निर्देशनमा निर्माण हुने भनिएको रोमान्टिक-सोसल ड्रामा चलचित्र ‘काजी’ ठिक दुई वर्षअघि घोषणा गरिएको थियो ।
२०८० असार अन्तिम साता घोषणा गरिएको यो चलचित्र २०८१ सालको बैशाख १ गतेलाई प्रदर्शन मिति समेत तय गरिएको थियो ।
चलचित्र ‘गणपति’को रिलिजअघि नै निर्माताले ‘काजी’ घोषणासँगै वर्षा सिवाकोटी, विजय बराल, बुद्धि तामाङ, सुमन कार्की र कैलाश कार्की कलाकारको रुपमा फाइनल भएका थिए । त्यसपछि मुख्य कलाकार विपिन कार्की भित्रिएका थिए ।
लामो समयसम्म निर्माण प्रक्रिया अघि नबढ्दा यो चलचित्र ठप्पजस्तै भएको थियो । बेलायतमा छायांकन हुने चलचित्रको घोषणाको दुई वर्ष बढी भइसक्दा पनि निर्माण हुन न सकेको चलचित्र ‘काजी’ अब बल्ल निर्माण हुने पक्का भएको छ ।
छायांकनको तयारी भइरहँदा चलचित्रमा अभिनेत्री भने हेरफेर भएका छन् । वर्षाको ठाउँमा निर्माण टिमले अभिनेत्री केकी अधिकारीलाई अनुबन्धित गरिसकेको स्रोतले बताएको छ ।
केकीले यस चलचित्रमा विपिनको अपोजिट भूमिका निर्वाह गर्नेछिन् । उनीहरूले यसअघि ‘प्रसाद २’ मा सँगै काम गरिसकेका छन् ।
निर्देशक लक्ष्मण रिजालका अनुसार चलचित्रको छायांकन आगामी भदौदेखि सुरु हुने तयारी भइरहेको छ । हाल ‘काजी’ को प्रि-प्रोडक्सन चरणका काम तीव्र गतिमा भइरहेको छ ।
चलचित्र ‘काजी’मा प्रदीप भारद्वाजको लेखन रहेको छ । पहिला यो चलचित्रको स्क्रिप्टमा भारद्वाज आफैंले निर्देशन गर्न लागेका थिए । तर, त्यो चलचित्र नबन्ने भएपछि उनले स्क्रिप्ट ‘काजी’ टिमलाई सुम्पिएका हुन् ।
‘डिसेम्बर फल्स’, ‘गणपति’ र ‘कायरा’ जस्ता चलचित्र निर्माण गरिसकेको रिजाल एण्ड रिजाल प्रोडक्सनको ब्यानरमा बन्ने ‘काजी’ का निर्माता रामप्रसाद रिजाल हुन् ।