‘सैयारा’को अग्रिम बुकिङले बलिउड हल्लियो, नेपालमा के होला ?
काठमाडौं । मोहित सुरीले निर्देशन गरेको नयाँ सिनेमा ‘सैयारा’ले रिलिज हुनुअघि नै भारतमा तहल्का मच्चाइरहेको छ । भोलि शुक्रबारदेखि रिलिज हुन लागेको यो चलचित्रको अग्रिम टिकट बुकिङ आक्रामक बनेको छ ।
यस्तो आक्रामक अग्रिम बुकिङले बलिउडका ट्रेड विज्ञहरूलाई समेत चकित पारेको भारतका चर्चित समिक्षा तरण आर्दशले आफ्नो सामाजिक सञ्जाल एक्समा उल्लेख गरेका छन् ।
यो चलचित्रको बुकिङ एक लाख नाघिसकेको छ भने रिलिजको पूर्वसन्ध्यामा डेढ लाख पार गर्ने अनुमान गरिएको छ । ‘सैयारा’को अग्रिम टिकट बुकिङले अहिले नै बक्स अफिसमा हिट हुने संकेत दिइरहेको छ ।
चलचित्र ‘सैयारा’मा नायक आहान पाण्डे र नायिका अनित पड्डा दुवै नयाँ अनुहार हुन् । मुख्य कलाकारहरू पहिलोपटक स्क्रिनमा देखिन लागेका उनीहरुलाई दर्शकले जुन प्रकारको साथ र उत्साह देखाइरहेका छन्, त्यसले बलिउडकै अनुभवी निर्माता–निर्देशकलाई अचम्ममा पारेको छ ।
सुरुवातमा ‘सैयारा’ले ३ देखि ४ करोड रुपैयाँको ओपनिङ गर्ने अपेक्षा गरिएको थियो । तर, दर्शकको उत्साह र क्रेजलाई हेर्दा अब यो चलचित्रले शुक्रबार मात्र २० करोड रुपैयाँसम्मको कलेक्सन गर्न सक्ने सम्भावना रहेको विश्लेषण शुरू भइसकेको छ ।
‘सैयारा’को लोकप्रियता यति चुलिएको छ कि यसका कलाकारहरूले न त कुनै ठूला मिडिया अन्तरवार्ता गरे, न सहर–सहर सिटी टुर नै गरे । तर, चलचित्रका गीत र ट्रेलरले सामाजिक सञ्जालमा यति ठूलो हंगामा मच्चायो कि दर्शकहरू फिल्मप्रति मोहमा रमाउन थाले । यही मोहको नतिजा हो, चलचित्रको व्यापार अहिले नै आँकलन गर्न मुस्किल पर्न थालेको छ ।
निर्देशक मोहित सुरीले ‘आशिकी २’, ‘आवारापन’ र ‘मलंग’ जस्ता हिट सिनेमा दिएर दर्शक माझ आफ्नो छाप छोडिसकेका छन् ।
‘सैयारा’ नेपालमा पनि शुक्रबारदेखि प्रदर्शनमा आउँदैछ । भारतको बक्स अफिसमा यो चलचित्रले ठूलो प्रभाव पार्ने निश्चित जस्तै देखिएसँगै नेपालमा कस्तो प्रभाव जमाउला भन्ने कौतुहलता थपिएको छ ।
अब हेर्न बाँकी छ, भारतमा पहिले नै चर्चा कमाएको ‘सैयारा’ले नेपाली दर्शकको मन कति जित्न सक्छ ?