विष्णु सापकोटा भन्छन्– कानुन सबैका लागि समान हुन्छ, अपमान गर्नेविरुद्ध कानुनी प्रक्रिया सुरु भइसक्यो
काठमाडौं । गायिका एलिना चौहानका पूर्वश्रीमान् विष्णु सापकोटाले सम्बन्ध बिच्छेद भइसकेको कुरा उठाएर आफूलाई मानसिक तनाव दिने काम भइरहेको बताएका छन् ।
उनले टिकटक भिडियोका पूर्वसम्बन्धलाई लिएर गाली गर्ने र अपमान गर्ने गरिएको भन्दै यसले आफूलाई मानसिक तनाव दिएको बताएका छन् ।
सम्बन्ध समाप्त भइसकेपछि कसैसँग बदला लिने, गिज्याउने, खिसीटिउरी गर्ने वा आफ्नो ऊर्जा नकारात्मक कुरामा खर्च गर्ने स्वभाव आफ्नो नरहेको भन्दै उनले भनेका छन्, “हिजोको दिनमा माया गरेर, परिवारको उपस्थितिमा, आदरपूर्वक घर भित्र्याइएको व्यक्तिको सम्मानका कारण पनि म समाप्त भइसकेको सम्बन्धबारे सार्वजनिक रूपमा बोल्न उचित ठान्दिनँ । दुबै पक्षको समझदारीमा सम्मानित अदालतले निर्णय गरिसकेको विषयमा पुनः बोल्दै हिँड्नु अदालतको अपमान पनि ठहर्छ ।”
सम्बन्ध माया र सम्मानका साथ सुरु भएको थियो भन्दै उनले त्यो लामो समय टिक्न नसके पनि त्यसको अन्त्य पनि सम्मानका साथ भएको स्मरण गरेका छन् ।
“अलग बसेको लगभग १ वर्ष र सम्बन्ध विच्छेद भएको ६ महिना कटिसक्दा पनि केही व्यक्तिहरूले फेरि पुराना विषयहरू सामाजिक सञ्जालमा ल्याउन थालेका छन्, जसले मेरो व्यक्तिगत जीवन, परिवार र व्यावसायिक वातावरणमा नकारात्मक असर पुर्याइरहेको छ,” उनले फेसबुकमा लेखेका छन्, “कठोर शब्द, धम्कीपूर्ण सन्देशहरू, मानसिक दबाब र चरित्र हत्या गर्ने प्रयासहरूले गर्दा म गम्भीर मानसिक पीडाबाट गुज्रिरहेको छु ।”
आफूलाई गाली गर्ने, अपमान गर्ने, व्यक्तिगत, पारिवारिक र व्यवसायिक जीवनमा क्षति पुर्याउनेविरुद्ध आफूले अष्ट्रेलियामा कानुनी प्रक्रिया अगाडि बढाइसकेको बताएका छन् । कानुन सबैका लागि समान हुने पनि उनले बताएका छन् ।