बक्स अफिसमा ‘निकिता रोय’ खराब अवस्थामा, फिल्मले दर्शक पाएन
काठमाडौं । बलिउड अभिनेत्री सोनाक्षी सिन्हाको नयाँ फिल्म ‘निकिता रोय’ बक्स अफिसमा निराशाजनक प्रदर्शन गरेको छ ।
भारतीय मिडियाका अनुसार जुलाई १८ शुक्रबार रिलिज भएको यो फिल्मले रिलिजको पहिलो दिन जम्मा २२ लाख रुपैयाँ मात्र कमाउन सफल भयो । यो फिल्म २०२५ को दोस्रो सबैभन्दा खराब ओपनिङ गर्ने फिल्म बनेको छ ।
यसै दिन ‘सैयारा’ र ‘तन्वी: द ग्रेट’ पनि रिलिज भएका थिए । मोहित सुरी निर्देशित ‘सैयारा’ ले धमाकेदार ओपनिङ गर्दै धेरैको ध्यान आकर्षित गर्न सफल भयो । त्यसैगरी अनुपम खेर अभिनित तन्वी: द ग्रेट को प्रदर्शन पनि राम्रो देखिएको छ । यी दुई फिल्महरूसँगको प्रतिस्पर्धाले ‘निकिता रोय’लाई थप कमजोर बनायो ।
सोनाक्षीलाई झट्का
सोनाक्षी सिन्हा अभिनित अलौकिक थ्रिलर ‘निकिता रोय’लाई उनका भाइ कुश एस सिन्हाले निर्देशन गरेका हुन् । फिल्ममा सोनाक्षीसँगै परेश रावल, अर्जुन रामपाल र सुहेल नायरले पनि अभिनय गरेका छन् । यद्यपि, दर्शकले यस फिल्मलाई खासै रुचाएनन् ।
‘निकिता रोय’ पहिले जुन २७ मा रिलिज हुने भनिए पनि सीमित स्क्रिन उपलब्धताका कारण फिल्मको मिति सारिएको थियो । तर, जुलाई १८ मा रिलिज गर्दा पनि फिल्मले अपेक्षित दर्शकको ध्यान खिच्न सकेन ।
‘निकिता रोय’को २२ लाखको ओपनिङले यसलाई २०२५ को दोस्रो सबैभन्दा खराब ओपनर फिल्म बनाएको हो । यसअघि सोनाक्षीको अर्को फिल्म ‘डबल एक्सएल’ले पहिलो दिन मात्र १५ लाख रुपैयाँ कमाएर उनको करियरको सबैभन्दा खराब ओपनिङ बनाएको थियो ।
यो फिल्मले विक्रान्त मेसीको ‘आँखों की गुस्ताखियां’ र ‘केसरी वीर’ जस्ता फिल्महरूभन्दा कम कमाइ गर्यो । ‘आँखों की गुस्ताखियां’ ३५ लाख र ‘केसरी वीर’ले २५ लाख भारु व्यापार गरेको थियो भने प्रतीक गान्धीको ‘फुले’ भन्दा माथि रहन सफल भयो । जसले मात्र १५ लाख भारु व्यापार गरेको थियो ।
बक्स अफिसमा पहिलो दिनको कमजोर कलेक्शनले ‘निकिता रोय’को भविष्य अन्योलमा पारेको छ । समीक्षकहरूको नराम्रो प्रतिक्रिया र दर्शकको चासोको कमीले गर्दा फिल्मले आगामी दिनमा राम्रो प्रदर्शन गर्ने सम्भावना निकै न्यून देखिएको छ ।