साउनमा रिलिज हुने तीन सिनेमालाई दर्शक जगाउनु पर्ने दबाब
काठमाडौं । साउनमा रिलिज हुने चलचित्रलाई दर्शक हलमा फर्काउने दबाब छ । ‘उनको स्वीटर’पछि खासै चलचित्र चलेका छैनन् ।
रिलिज भएका चलचित्रले हलमा दर्शक तान्न सकेका छैनन् । यसै पनि असार र साउनमा झरी पर्छ भनेर यसै पनि निर्देशक तथा निर्माताले चलचित्र रिलिज नै गर्दैनन् । रिलिजमा आएका चलचित्रले पनि दर्शकलाई हलसम्म तान्न सकेका छैनन् ।
वैशाखको हिट भएको ‘ऊनको स्वीटर’लाई अझै केही हलहरूमा छ । असारको अन्तिममा चलचित्र ‘यो मन त मेरो नेपाली हो’ पनि एकाध हलमा प्रदर्शन भइरहेको छ । तर, यसले धेरै दर्शकलाई हलसम्म तान्न सकेन । खासै धेरै प्रचारप्रचारविना नै आएको यो चलचित्रले दर्शकको मन जित्न सकेन ।
अब एकैपटक साउन दोस्रो साता अर्थात् १६ गते मात्र नेपाली चलचित्र रिलिज हुँदैछ । त्यो हो, ‘रियाल रिङ्गेट’ । त्यसपछि साउन २३ गते दुई वटा चलचित्र ‘सिटामोल’ र ‘मोहर’ प्रदर्शन हुँदैछन् । मनसुनका कारण असार र साउनमा फिल्म रिलिजको चाप कम भए पनि भदौदेखि हलहरू नेपाली फिल्मले भरिभराउ हुनेछन् ।
अब रिलिजमा आउने चलचित्र ‘रियाल रिङ्गेट’, ‘सिटामोल’ र ‘मोहर’ले दर्शकको मन जित्न सक्छन् कि सक्दैनन् हेर्न बाँकी छ ।
‘रियाल रिङ्गेट’लाई विभोर पोखरेलले निर्देशन गरेका छन् । चलचित्रमा प्रमोद चौलागाईं, निता ढुङ्गाना, छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राईलगायतका कलाकारहरूको अभिनय रहेको छ ।
चलचित्रको लेखन प्रदीप भारद्वाज ले गरेका हुन् । ‘रियाल रिङ्गेट’ को छायाङ्कन भारतको राजस्थान, नेपालका चितवन, काठमाडौं र लेटाङमा गरिएको छ । यो चलचित्रलाई काफिया फिल्म्स ले वितरण गर्नेछ ।
‘सिटामोल’लाई राज बहादुर सानेले निर्देशन गरेका छन् । सौगात मल्ल, बेनिशा हमाल, श्री कृष्ण निरौला, जानुका विश्वकर्मा, लोकेन्द्र लेखकलगायत कलाकारको अभिनय छ ।
तुल्सी देवी फिल्म प्रालीले जुनतारा फिल्मस्को सहकार्यमा निर्माण भएको सिनेमाको कथा प्रदीप भारद्धाज र निर्देशक सानेले लेखेका हुन् । सिमोस सुनुवारको प्रस्तुती रहेको सिनेमामा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता अनि गंगाराम श्रेष्ठ सहनिर्मातामा छन् ।
‘मोहर’लाई लेखक तथा निर्देशक ओम प्रतिकले निर्देशन गरेका छन् । निर्माता चुम्बन जंग शाही हुन् ।
देउकी प्रथामा आधारित रहेर तयार पारिएको यो चलचित्रमा पल शाह र बेनिशा हमाल मुख्य भूमिकामा छन् । नीति शाह, अर्जुन जंग शाही, रवीन्द्र झालगायत कलाकारहरुको अभिनय छ ।