२५ वर्षपछि म्यूजिक भिडियो किन खेलिन् त रेखाले ?
काठमाडाैं । फिल्मबाहेक अन्यत्र लगभग नदेखिएकी रेखा थापा दोस्रो म्यूजिक भिडियोमा देखिने भएकी छन् । उनका समकालीन तथा अनुज अभिनेत्रीहरूले फिल्मको सीमाभित्र मात्र रहन नसकेका बेला थापा म्यूजिक भिडियो देखिनन् ।
रेखा थापाले आफ्नो झन्डै २५ वर्ष लामो करियरमा एउटामात्र म्यूजिक भिडियो खेलेकी छिन् त्यो पनि आफ्नो करियरमा संघर्षरत हुँदा खेलेकी थिइन् । उनले खेलेको एकमात्र म्यूजिक भिडियो चर्चित गायक आनन्द कार्कीको चर्चित गीत ‘लाग्छ मन हेरिरहुँ’ हो । त्यसपछिका वर्षहरूमा फिल्मसरह पारिश्रमिकको प्रस्ताव आए पनि कुनै म्यूजिक भिडियो नखेलेकी रेखा अब भने म्यूजिक भिडियोमा देखिन लागेकी छिन् ।
उनको दोस्रो म्यूजिक भिडियो केही दिनमा रिलिज हुने तयारीमा छ । साउन १६ गते रिलिज हुने ‘नाइँ भनेसी नाइँ’ बोलको म्यूजिक भिडियो प्रकाश सपुतको कम्पोजिसन तथा निर्देशनमा तयार भएको हो ।
यो म्यूजिक भिडियो किन खेलिन् त रेखाले ?
प्रकाश सपुतले तीजलाई लक्षित गरेर निकालेको यस गीतको विषयवस्तुका कारण आफू म्यूजिक भिडियोमा देखिन तयार भएकाे रेखा बताउँछिन् । ‘नाइँ भनेसी नाइँ’ बोलको गीतले एउटी बालिका, युवती, महिला र समस्त आमाहरूको आत्मसम्मानको विषय उठाएकोले म यो गीत गर्न तयार भएकी हुँ’, रेखाले भनिन्, ‘विगतमा पनि म समस्त छोरीहरूको सवालमा, उनीहरूको पक्षमा सधैं नै उभिंदै आएकी छु । त्यसका विविध मञ्च तपाईंहरूले देख्दै आउनुभएको छ । यसपटक यो संगीतको मञ्च मलाई उपयुक्त लाग्यो । यतिबेला म नारी मात्र नभएर एउटी छोरीकी आमासमेत भएकाले यो विषयलाई मैले “नाईं” होइन “हुन्छ” भन्नुपर्छ भनेर खेले ।’
गायक हुँदै फिल्मका निर्माता, लेखक तथा निर्देशकसमेत बनिसकेका प्रकाश सपुतले गत वर्ष ‘बसन्त’ फिल्मका कारण तीजको छेकोमा गीत निकाल्न नसकेको बताउँदै, यो गीतको कन्सेप्ट तयार हुँदा नै रेखा थापालाई सोचेर बनाइएको बताए ।
रेखाले म्यूजिक भिडियो नगर्ने सुनेको भए पनि विषयवस्तुका कारण थापाले स्वीकार्ने विश्वास आफूलाई भएकाले प्रस्ताव गरेको प्रकाशको भनाइ छ । ‘दिदीलाई जुन विषय छानिएको छ, त्यसले धेरै छोयो । उहाँसँग जब मैले विषयको कुरा गरें, उहाँले “यसमा फिल्म बनाउन सकिंदैन?” भनेर सोध्नुभएको थियो’, प्रकाशले भने, ‘अहिले फिल्म बनाउनचाहिँ अलि तयारी छैन, “भिडियोमार्फत भनौं, अझ धेरै ठाउँमा पुग्छ” भनेपछि दिदी खेल्न तयार हुनुभयो।’
प्रकाशले यो ‘नो मिन्स नो’ गीतका लागि ५–७ वटा मेलेडी बनाएको जानकारी दिए । गीतमा एलिना चौहान तथा समीक्षा अधिकारीले स्वर दिएका छन् ।