६१ लाख पारिश्रमिकको फन्डाले गलाएपछि बिन्ती बिसाउँदै निर्माण टिम
काठमाडाैं । चलचित्रको प्रचारमा विविध रणनीति अपनाइन्छ । तर, केही समययता देखिएको प्रवृत्ति भने ‘फन्डा–फन्डा–फन्डा’ हो ।
जब कुनै चलचित्रको नाम घोषणा हुन्छ, त्यसपछि ट्रेलर वा गीतभन्दा पहिला ‘फन्डा’ले नै प्रचारको लहर ल्याउने प्रवृत्ति बढ्दो छ । पछिल्लो उदाहरण बनेको छ, भदौ ६ गते प्रदर्शनमा आउन लागेको चलचित्र ‘माग्ने राजा’ ।
यहीबाट सुरु भएको महँगो पारिश्रमिकले पछिल्लो समय प्रदर्शनमा आउन लागेको चलचित्रका कलाकार हुन् या घोषणा गर्दा भेट भएका कलाकार जो कोहीले यही एउटा प्रश्नको सामना गर्दै आइरहेका छन्, महँगो पारिश्रमिकका बारेका के भन्नु हुन्छ ?
यता, सुरुमा सस्तो हाइपजस्तै देखिएको यो प्रसंग अहिले चलचित्र ‘माग्ने राजा’कै छाया बन्न थालेको छ ।
चलचित्रमा केदार घिमिरे ‘माग्ने बुढा’ मुख्य भूमिकामा छन् भने निर्देशन गरेका छन् ऋषि लामिछानेले । सोलो लिडमा प्रस्तुत हुँदै गरेका केदार घिमिरेको ‘पहिलोपटक दीपकराज गिरीको टिम बाहिरको ब्यानरमा काम’ भएको चलचित्र भन्दै निर्माण पक्षले विशेष चर्चा बटुल्न खोजेको थियो । तर, प्रचारका क्रममा ६१ लाख पारिश्रमिकको प्रसंगले अनपेक्षित विवाद निम्त्यायो ।
कसरी सुरु भयो विवाद ?
असार ६ गते यो चलचित्रको पोस्टर सार्वजनिक गर्ने कार्यक्रममा निर्माता मुनाल घिमिरेले केदार घिमिरेलाई ६१ लाख पारिश्रमिक दिएको दाबी गरेका थिए । उनले यो कुरा कसम खाँदै भनेपछि मिडिया र दर्शकमाझ ठूलो हल्ला मच्चियो ।
उक्त भनाइपछि सामाजिक सञ्जालमा चर्को बहस शुरु भयो । धेरैले सोचे- नेपाली कलाकारले साँच्चै यति ठूलो पारिश्रमिक लिन थालेका छन् ? कि सस्तो प्रचारको लागि बनाइएको झुटो कथा हो ?
तर, केही दिनमै स्वयं केदार घिमिरेले उक्त दाबीलाई झुठो बताए । उनले आफूले यति ठूलो रकम नलिएको स्पष्ट पार्दै पारिश्रमिकको हल्ला ‘अनावश्यक हाइप’ सिर्जना गर्न प्रयोग गरिएको बताएका थिए ।
त्यसपछि निर्माण टिममाथि नैतिक प्रश्न उठ्न थाल्यो । चलचित्रको ट्रेलर, पोस्टर, गीतको कमेन्ट सेक्सनमा ट्रोल र आलोचनाले भरिन थाले । यसपछि चलचित्रको प्रचार सामग्रीमा सामाजिक सञ्जालमा टिप्पणीको ओइरो लाग्यो ।
मंगलबार चलचित्रको गीत सार्वजनिक कार्यक्रममा निर्देशक ऋषि लामिछानेले उक्त घटनाबारे क्षमायाचना गरे ।
उनले मञ्चमै भने, ‘म सबैसँग माफी माग्छु । त्यो नियतबस भनेको होइन, गल्ती भयो । म खुट्टा छोएको सम्झिएर क्षमा दिनुहोस् ।’
त्यसक्रममा उनले पत्रकारहरूसँग पनि अनुरोध गर्दै भने, ‘आज गीतको कार्यक्रम हो, पारिश्रमिकको कुरा नगर्दिनुस् । त्यो विषय सकिएको हो ।’
‘पारिश्रमिक फन्डा होइन’ भन्दै निर्देशक लामिछानेले फिल्म प्रचार गर्न पारिश्रमिकजस्ता फन्डाको प्रयोग गर्नु पर्ने बाध्यता नभएको पनि प्रस्ट्याए ।
उनका अनुसार निर्माण पक्षले ध्यान दिनुपर्ने विषय फिल्मको कथा, अभिनय र प्रस्तुति हुनुपर्ने हो, बाहिरी हल्ला र फन्डा होइन ।
यता, केदार घिमिरेले भने यस विषयमा अझै सार्वजनिक प्रतिक्रिया दिएका छैनन् । तर, दर्शकमाझ फैलिएको भ्रम हटाउने जिम्मेवारी भने निर्माण टिमकै काँधमा आएको छ ।
कमेडी शैलीमा निर्माण गरिएको ‘माग्ने राजा’ले सामाजिक विषय उठान गर्दै दर्शकलाई मनोरञ्जन दिने दाबी गरिएको छ । चलचित्रमा केदारसँगै वर्षा सिवाकोटी, विल्सन विक्रम राई, शिशिर वाङ्देल, टिकटकर मोडल पवित्रा साकी ‘मिस पबी’को अभिनय छ । अभिनेता आर्यन सिग्देलको पनि विशेष भूमिका छ ।
सिनेमामा नरेन्द्र मैनालीको छायांकन, सामीप्यराज तिमल्सेनाको लेखन, सुजिल कर्माचार्यको पार्श्र्व संगीत र मित्र गुरुङको सम्पादन रहेको छ ।
गीत-संगीतमार्फत चलचित्रको प्रचार अगाडि बढाइँदैछ । तर, विवादको धुँवा नसेलाउँदै सिनेमाले अपेक्षित चर्चा बटुल्ला कि गुमाउने हो भन्ने प्रश्न उठिरहेको छ ।
‘माग्ने राजा’ विवादबाट मुक्त भएर ‘कन्टेन्ट’ले बोल्ने प्रयासमा छ । तर, सामाजिक सञ्जाल र दर्शकको मनमा बसिसकेको ६१ लाखको गफ हटाउने चुनौती अझै बाँकी छ ।