रिलिज डेट पटकपटक फेरबदल नगर
नेपाली चलचित्र उद्योगमा यति धेरै चलचित्र रिलिज हुन्छन् कि कुन चलचित्र कहिले आउँछन् र कहिले जान्छन् भन्ने पत्तै हुँदैन । बहुसंख्यक चलचित्र रिलिज भएको र उत्रिएको बहुसंख्यक दर्शकलाई थाहा हुँदैन ।
बजार सानो छ । बजार अनुसारका दर्शकको संख्या पनि सानै छ । स्तरीय सिनेमा बन्दैनन्, त्यसैले अधिकांश चलचित्रको रिलिज मिति दर्शकलाई याद हुँदैन । केही नाम चलेका सिक्वेल र केही ब्यानरका केही चलचित्रबाहेक अधिकांश सिनेमा आए/गएको दर्शकले भेउ पाउँदैनन् ।
त्यसैले अहिले निर्माता तथा निर्देशकलाई आफ्नो चलचित्रको रिलिज डेट दर्शकलाई कसरी जानकारी दिने भन्नेबारे नै सबैभन्दा ठूलो चिन्ताको विषय बनिसकेको छ । हप्ताकै दुई/तीनवटा नेपाली सिनेमा रिलिज हुने, त्यसमा पनि आयातित सिनेमा थपिने भएपछि बग्रेल्ती चलचित्रको भिडमा कुहिरोको काग हुनु स्वभाविक हो ।
यस्तो कठिन परिस्थितिबाट चलचित्र गुज्रिरहेका बेला त्यसमा पनि एउटै सिनेमाको रिलिज डेट पटकपटक तलमाथि हुँदा दर्शकलाई झन धेरै जिकज्याक हुन्छ । यो पनि दर्शकले चलचित्र आए/गएको थाहा नपाउने अर्को कारण हो ।
समस्या कै रुपमा यो देखिइरहेको छ । यसको तत्काल निरुपण गर्नुपर्ने अवस्था छ ।
चलचित्रको कथा तयार नहुँदै सिनेमा निर्माणको घोषणा गर्ने र रिलिज डेट लिने चलन यसको मुख्य जड हो । ‘नानी पाउनु कहिले कहिले कोक्रो बुन्नु अहिले’ भने जस्तो सिनेमा केमा बनाउने भन्ने कथा तयार नहुँदै, को हो कलाकार निश्चित नहुँदै र निर्देशक फिक्स नहुँदै रिलिज डेट लिने चलन छ ।
रिलिज डेट आइसकेको हुन्छ तर चलचित्र सुटिङमा गएको हुँदैन । त्यसैले एउटै चलचित्रको रिलिज डेट पटकपटक पर सार्नुपर्ने हुन्छ । यसै पनि नेपाली चलचित्रको प्रचार अपर्याप्त बजेट र क्रिएटिभ आइडियाको कमीका कारण कमजोर हुन्छ । यसमा पनि पटक पटक रिलिज मिति परवर्तन भएपछि दर्शकमा आफ्नो सिनेमाको रिलिन डेट कण्ठ गराउन कठिन हुन्छ ।
प्रचार गर्ने भनको कन्टेनमार्फत नै हो । प्रचारका लागि कन्टेन निकाल्न नसक्ने निर्माता र निर्देशकले पटकपटक रिलिज डेट परिवर्तन गरेपछि सिनेमाको भीडमा कुन सिनेमा कहिले हो भनेर दर्शकले कसरी थाहा पाउने ? यसलाई निर्माता र निर्देशकले मनन गर्न नसके राम्रै चलचित्रले पनि बजार नपाउने जोखिम उच्च हुन्छ । यसबाट निर्माता र निर्देशक सचेत हुनु अहिलेको आवश्यकता हो ।