साहित्यिक कृतिमा आधारित पहिलो चलचित्र कुन हो ?
काठमाडौं । नेपाली चलचित्र उद्योगमा सधैँ एउटै कुराको रोइलो हुन्छ, र त्यो हो कथा गतिलो भएन, स्क्रिप्ट गतिलो भएन ।
कथा र स्क्रिप्ट भनेजस्तो नहुँदा राम्रो चलचित्र बनाउन सकिएन भन्ने गुनासो निर्देश र निर्माताहरूको रहँदै आएको छ । बलियो स्क्रिप्ट र कथा नहुँदा नेपाली चलचित्र भनेजस्तो राम्रो नबनेको उनीहरूले बताउँदै निर्देशक र निर्माताले बताउने गरेका छन् ।
कतिपयले निर्देशक र निर्माताहरूको यो गुनासो सम्बोधनका लागि साहित्यिक कृतिमा चलचित्र बनाउन सुझाव आउने गरेको छ । तर नेपालमा साहित्यिक कृति बन्न थालेको धेरै भइसकेको छ ।
चलचित्र ‘परिवर्तन’बाटै साहित्यिक कृतिमा चलचित्र बन्न थालेका थिए । हिरा सिंह खत्री निर्देशित चलचित्र ‘परिवर्तन’बाट यसको सुरुवात भएको थियो ।
जनार्दन समद्वारा लिखित ‘चेतना’ नाटकमा आधारित रहेर चलचित्र ‘परिवर्तन’ बनेको थियो । यो नै कृतिमा बनेको पहिलो नेपाली चलचित्र हो ।
तत्कालीन श्री ५ को सरकार अन्तर्गतको सूचना विभागले निर्माण गरेको चलचित्र ‘परिवर्तन’को पटकथा लेखन भने चेतन कार्की र हिरा सिंह खत्रीले लेखेका थिए ।
‘परिवर्तन’मा यज्ञनाथ घिमिरे, रीता थापा, मित्रलाल, नीर शाह, हरिप्रसाद रिमाल, सुष्मा शाही, यादव खरेल आदिको अभिनय रहेको छ ।
परिवर्तन विसं २०२७ साल पुस १७ गते मा प्रथम पटक प्रदर्शनमा आएको थियो । सूचना विभागले निर्माण गरेको यो तेस्रो चलचित्र थियो ।
अहिले भर्खरै केही समय अगाडि यही नाममा अर्को चलचित्र निर्माणको घोषणा भएको छ । १० वर्षपछि पहिलो प्रयोग भइसकेको नाममा चलचित्र बनाउन पाइन्छ ।
त्यसयता थुप्रै चलचित्र कृतिमा आधारित रहेर बनिसकेका छन् । तर, राम्रा कृतिमा बनाउँदैमा सबै चलचित्र राम्रो हुँदैनन् भन्ने पनि प्रमाणित भइसकेको छ ।
किनकी चलचित्र कथाले मात्रै राम्रो बन्दैन । पटकथा र संवाद सिनेमा अर्को महत्वपूर्ण पक्ष हो ।
चलचित्र ‘कुमारी’, ‘वासुदेव’, ‘तीन घुम्ती’, ‘झोला’, ‘वसन्ती’, ‘बसाइँ’, ‘सेतो बाघ’, ‘प्रेमपिण्ड’, ‘समर लभ’, ‘चिसो एस्ट्रे’, ‘मसान’, ‘सिरिसको फूल’, ‘झिँगे दाउ’, ‘अग्नि दहन’, ‘मुनामदन’ लगायत आख्यानमा चलचित्र बनेका छन् । तर, यी सबै चलचित्र सफल भएका छैनन् । जबकी कृतिका रूपमा यी पाठकले रुचाएका आख्यान हुन् ।