‘सैयारा’ पछि ‘धडक २’को चर्चा, क्लाइमेक्सले दिमाग हल्लाउने दाबी
काठमाडौं । हालै प्रदर्शनमा आएको बलिउड सिनेमा ‘सैयारा’ बक्स अफिसमा धमाकेदार कमाइ गर्दै नयाँ कीर्तिमान बनाइरहेको छ । निर्देशक मोहित सुरीको निर्देशनमा बनेको यो चलचित्रले दर्शक र समीक्षक दुवैको मन जित्न सफल भएको छ ।
अहान पाण्डे र अनिता पड्डाको डेब्यू चलचित्र ‘सैयारा’ ले रिलिजको चार दिनमै १०० करोड रुपैयाँ कमाएर तहल्का मच्चाएको थियो । अब ११ औं दिनसम्म आइपुग्दा यसको कुल बक्स अफिस कलेक्शन २५३.९३ करोड पुगेको छ ।
यसैबीच, बलिउडमा अर्को नयाँ सिनेमा ‘धडक २’ ले चर्चा बटुल्न थालेको छ । आउँदो अगस्ट १ मा प्रदर्शनमा आउने यो फिल्मलाई लिएर ठूलो चर्चा छ, विशेषतः यसको क्लाइमेक्सका कारण ।
धर्मा प्रोडक्सनको ब्यानरमा बनेको ‘धडक २’ मा सिद्धान्त चतुर्वेदी र तृप्ति डिमरीले मुख्य भूमिका निर्वाह गरेका छन् । यो सिनेमालाई शाजिया इकबालले निर्देशन गरेकी हुन् ।
यस चलचित्रलाई करण जोहर, उमेश कुमार बंसल, आदर पूनावाला, अपूर्व मेहता, मीनु अरोरा, सोमेन मिश्रा र प्रगति देशमुखले निर्माण गरेका हुन् । सिनेमाको कथा र संवाद राहुल बडवलकर र शाजिया इकबालले लेखेका हुन् ।
‘गली ब्वाई’ र ‘गहराइँ’ जस्ता चलचित्रमा अभिनय गरेका अभिनेता सिद्धान्त दर्शकसामु आउँदै गर्दा ‘धडक २’ लाई ‘आध्यात्मिक सिक्वेल’ भनेका छन् ।
अभिनेता सिद्धान्त भन्छन्, ‘‘धडक २’ आत्मासँग सम्बन्धित कथा हो, नामको सिक्वेल होइन । आत्मा उस्तै छ, तर शरीर, स्थान र परिस्थितिहरू पूर्णतया फरक छन् । पहिलो ‘धडक’ मा निर्दोष कलेज प्रेम थियो, तर यस पटक कथा गहिरो र सत्य छ ।‘
‘यो यस्तो प्रेम हो जुन केवल देख्न वा भन्न सकिँदैन, यसलाई बाँचेर मात्र बुझ्न सकिन्छ। तपाईंले यो फिल्ममा बढी मौनता पाउनुहुनेछ र त्यो यसको सबैभन्दा ठूलो शक्ति हो,” उनले अगाडि थपे ।
सिद्धान्तका अनुसार फिल्मको क्लाइमेक्स यति शक्तिशाली छ कि दर्शकलाई गहिरो असर पर्नेछ ।
उनी भन्छन्, “यो सामान्यतया अपेक्षित क्लाइमेक्स होइन । जब दर्शकहरूले अन्त्य देख्छन्, उनीहरू केही समयको लागि शान्त हुनेछन् । किनकि त्यो केवल दुई व्यक्तिको कथा होइन, सम्पूर्ण समाजको कथा हो ।”
“कहिलेकाहीं मलाई लाग्यो कि म त्यो पात्रको ठाउँमा भएको भए सायद यति धेरै सहन सक्दिन थिएँ । तर जब तपाईं अरूको जीवन बाँच्नुहुन्छ, उनीहरूको पीडा महसुस हुन्छ,” उनी भन्छन् ।