कलाकार र निर्देशक भन्छन्– ‘सिटामोल’ युद्धपछिको यथार्थ र सम्बन्धको कथा हो
काठमाडौं । राजबहादुर सानेको निर्देशनमा निर्माण भएको चलचित्र ‘सिटामोल’ आगामी साउन २३ गतेदेखि देशभर प्रदर्शनमा आउँदैछ ।
कर्णाली क्षेत्रको सामाजिक यथार्थ, जनयुद्धपछिको मनोविज्ञान, मानसिक पीडा र सम्बन्धहरूको बिछोडलाई समेटेको यो सिनेमाले प्रदर्शनपूर्वै दर्शकको चासो आकर्षित गरिसकेको छ।
चलचित्रको टिजर र ट्रेलर सार्वजनिक भइसकेका छन्, जसमा सपना, दुर्घटना, बेमेल सम्बन्ध र त्यसको असर मार्मिक रूपमा प्रस्तुत गरिएको छ । टिजरमा एक यस्तो परिवारको कथा देखिन्छ, जहाँ श्रीमान् शारीरिक रूपले अशक्त छन् भने श्रीमती आफ्नो क्षमताभन्दा ठूलो सपना देख्छिन् । अशक्तताको बोझ, आर्थिक अभाव, पारिवारिक विखण्डन र ग्रामीण जनजीवनको कष्ट सिनेमाले उजागर गर्ने संकेत ट्रेलरमा पाइन्छ ।
निर्माण टिमले दर्शकहरूले चलचित्र ‘सिटामोल’लाई सकारात्मक रूपमा लिने विश्वास व्यक्त गरेका छन् । यही सन्दर्भमा सिनेमा टिमले आफ्नो दृष्टिकोण र सिनेमाको सारबारे थप प्रस्ट पारेका छन् ।
निर्देशक सानेका अनुसार ‘सिटामोल’ गरिबी बेच्ने चलचित्र होइन, बरु समस्याको पहिचान गर्दै समाधानको सम्भावना खोज्ने प्रयास हो । उनी भन्छन्, “म जुम्लामा जन्मिएको व्यक्ति हुँ, त्यहाँको पीडा नजिकबाट बुझेको छु । सिनेमा त्यसै अनुभवको प्रतिविम्ब हो ।”
उनका अनुसार चलचित्र जनयुद्धपछि विशेष गरी सेना समायोजनपछि देखिएको मानसिक, शारीरिक र सामाजिक समस्यामाथि आधारित छ । उनले थपे, “युद्धले हजारौंलाई विस्थापित बनायो । तिनले भोगेको मनोविज्ञान, सम्बन्धको विखण्डन र समाजको बदलिँदो धारणा हामीले पर्दामा उतारेका छौं ।”
चलचित्रका प्रमुख अभिनेता सौगात मल्लका अनुसार ‘सिटामोल’ केवल औषधिको नाम होइन, एक प्रतीक हो । “शरीरको पीडामा सिटामोलले राहत दिन्छ भने, यो सिनेमा मनको पीडामा मलम लाग्ने काम गर्छ,” उनले भने ।
सौगातका अनुसार यो चलचित्र आफूले खेलेका सबैभन्दा भावुक सिनेमामध्ये एक हो । उनी भन्छन्, “जब कथा पोल्छ, आँसु आफैँ आउँछ ।”
अभिनेत्री बेनिशा हमालले चलचित्रलाई बिग्रिएको सम्बन्ध सुधार्ने सन्देशवाहकको रूपमा वर्णन गरिन् । उनले भनिन्, “सिटामोल औषधिले सबै रोग ठीक गर्दैन, तर हाम्रो सिनेमा ‘सिटामोल’ले सम्बन्ध कसरी सुधार्न सकिन्छ भन्ने कुरा सिकाउँछ । जब आफ्नो मान्छेले साथ दिन्छ, जीवन कस्तो हुन सक्छ भन्ने कुरा पनि सिनेमाले देखाउँछ ।’
चलचित्रमा सौगात र बेनिशासँगै श्री कृष्ण, जानुका र करणसहित लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार आराध्या राज्यलक्ष्मी डिसीको अभिनय छ । श्री कृष्ण र जानुकाले यही सिनेमाबाट नेपाली रजतपटमा डेव्यु गरेका हुन् ।
तुल्सी देवी फिल्म प्रालीले जुनतारा फिल्मस्को सहकार्यमा निर्माण भएको ‘सिटामोल’को कथा प्रदीप भारद्धाज र निर्देशक सानेले लेखेका हुन् ।
सिमोस सुनुवारको प्रस्तुति रहेको सिनेमामा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता अनि गंगाराम श्रेष्ठ सह–निर्मातामा छन् ।
बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, डिआई कलर राजेन्द्र मोक्तान, साउन्ड डिजाइनर मुकेश शाह, द्धन्द्व निर्देशन देव महर्जन र शंकर महर्जन, राकेश दाहालको पोस्टर डिजाइन, प्रोडक्सन म्यानेजर विकास तामाङ र धनबहादुर राई रहेको सिनेमालाई दिव्य सुवेदीले खिचेका हुन् ।