भ्रम र डरको घेरा तोड
अहिले दर्शकले चाहेर पनि नेपाली चलचित्र हेर्न पाउँदैनन् । किन भने हलमा नेपाली चलचित्र नै छैनन् ।
आधा दर्जनभन्दा माथिको संख्यामा हलमा चलचित्र हुँदा नेपाली चलचित्र नहुनु आफैँमा बिडम्बनापूर्ण हो । अहिले सिनेमा हलले नेपाली सिनेमालाई शो नदिएर अथवा बलिउड र हलिउडका ठूला सिनेमा आउँदैछन् नेपाली सिनेमा नलगाउ भनेर पनि नेपाली निर्माताले आफ्ना सिनेमा नलगाएका होइनन् ।
निर्माता आफैँले चलचित्र प्रदर्शन नगरेका हुन् । निर्मातासँग चलचित्र नभएर पनि चलचित्र प्रदर्शन नगरेका होइनन् । निर्माण भएर रिलिज हुन बाँकी चलचित्रको संख्या ठूलो छ ।
यसको कारण वर्षात् सिजन हो । वर्षात्को सिजनमा दर्शक सिनेमा हेर्न जाँदैनन् भनेर चलचित्र रिलिज नगरेका हुन् ।
पक्कै पनि ठूलो पानी परेको समयमा, बाढी पहिरो आएर धनजनको क्षति भएको अवस्थामा दर्शक हलमा जाँदैनन् । सानो देशमा एक ठाउँको घटनाले अर्को ठाउँमा असर गर्छ । सानो बजार भएको देशमा यसले चलचित्रको ब्यापारलाई असर गर्छ ।
तर, वर्षात् सिजन भन्नबित्तिकै असारदेखि असोजसम्म चार महिना नै हरेक दिन रात वर्षा हुन्छ भन्ने हुँदैन । त्यो डर र भ्रम मात्रै हो । यही भ्रम र डरका कारण असार साउनमा प्राय नेपाली चलचित्र निर्माताहरूले लगाउँदैनन् ।
नेपाली निर्माता डराएर भागिरहँदा यसको फाइदा नेपालमा आएर बलिउड र हलिउडका चलचित्रले उठाइरहेका छन् । ‘सैयारा’लाई यसको उदाहरणका रूपमा लिन सकिन्छ । ‘सैयारा’ले अहिले नेपालमा ठूलो परिमाणमा पैसा कमाइरहेको छ । नेपालमा सुपरहिट भइसकेको छ ।
जबकी यही समय सोलो रिलिजको मौका नेपाली चलचित्रले गुमाए । सोलो रिलिज मात्रै होइन अघिल्ला पछिल्ला हप्तामा पनि सिनेमा रिलिज नहुने अवस्थामा पनि चलचित्र रिलिज भएनन् ।
एकातिर निर्माताले सोलो रिलिजको मौका गुमाए भने अर्कोतिर नेपाली दशर्कलाई नेपाली सिनेमा हेर्नबाटै बञ्चित गराए । राम्रो चलचित्र भए जहिले पनि चल्छ ।
नेपाली भएर नेपाली सिनेमालाई नै माया नगर्ने भनेर दर्शकलाई आरोप आइरहँदा महिनौँसम्म सिनेमा भएर पनि रिलिज नगर्दा दर्शकले चाहिँ गाली गर्ने कि नगर्ने ?
नेपाली सिनेमाबाट दर्शकलाई बञ्चित गराउनु हुँदैन । यसै पनि नेपाली सिनेमाको न्यून गुणस्तरका कारण दर्शकले अप्सन खोजिरहेका बेला नेपाली सिनेमा हेर्न चाहनेले पनि हेर्न नपाउँदा त्यसको सकारात्मक छाप पर्दैन ।